救人一命，勝造七級浮屠。香港人有愛心，為善不甘後人，尤其係救急扶危，更加係一向踴躍。東方日報慈善基金與太陽報愛心基金全力為患有先天性心臟病嘅小謙謙籌募醫療費用，報道一出街，迅即引起極大回響，讀者紛紛來電為謙謙送上鼓勵及祝福，既令人感動，亦令人振奮。
早產男嬰林廷謙出生時體重不足一磅半，十五個月來從未離開病房，更因患有先天性心臟病誘發氣管及支氣管收窄，無法張開氣道自行呼吸，多次因缺氧而徘徊於死亡邊緣，需長期依靠呼吸機協助呼吸。醫生建議謙謙接受氣管及支氣管支架植入手術以改善呼吸困難，赴台灣接受手術成為謙謙唯一希望，可惜醫療費用高達一百五十萬港元，對於從事飲食業、月入僅萬元嘅林父嚟講，簡直可望不可即。有見及此，東方日報慈善基金與太陽報愛心基金伸出援手，登高一呼，應者雲集，為謙謙重獲新生帶來希望。
病魔無情，人間有愛，善長仁翁嘅加油及祝福，對陷於絕望邊緣嘅謙謙父母嚟講，無疑係一支強心針。林父感激咁話，估唔到消息見報之後得到咁多人嘅支持同鼓勵，覺得好窩心，亦要多謝東方日報慈善基金與太陽報愛心基金嘅援手，否則都唔知點算好。
正所謂，助人為快樂之本，東方日報慈善基金與太陽報愛心基金凝聚社會愛心，展現人性光輝，咁多年來助人無數，功德無量，今次只不過係其中一個例子。當年罹患先天性單邊肺部發育不全綜合症嘅蔡文茵同死神搏鬥十個月，後來喺東方日報慈善基金與太陽報愛心基金全力協助下，一個月內就籌得善款逾一百八十萬元，順利遠赴台灣榮民總醫院接受植入氣管支架手術。現年三歲嘅茵茵唔止擺脫全天候佩戴呼吸機嘅煎熬，仲可以同其他小朋友一樣跑跑跳跳。功夫茶相信，有兩個基金嘅全力幫助，有咁多善長嘅鼓勵支持，茵茵做得到，謙謙亦一定做得到，加油吖！
講開又講，以前香港嘅醫療技術同水準可以講係兩岸三地中首屈一指，點知近年每況愈下，好多病人都要被迫轉去台灣治療，茵茵係咁，謙謙係咁，菲律賓人質慘劇傷者易小玲亦係咁，你話香港係咪丟架吖？所以話，庸官禍港真係冇講錯，前食衞局局長周一嶽執掌醫療系統八年，搞到烏煙瘴氣，服務水準低落，簡直害人害物。
此地不醫人，自有醫人處，香港醫療靠唔住，好彩仲有台灣信得過。喺東方日報慈善基金與太陽報愛心基金嘅幫助，以及各位愛心讀者嘅支持下，希望謙謙能夠早日成行，重獲新生！