賓賓繼續賴皮 制裁必須加碼

新年快樂!恭喜發財!功夫茶同各位親愛嘅讀者拜年,祝大家心想事成,龍馬精神,甲午馬年喜氣洋洋,一年三百六十五日都如意吉祥!

新年流流唔應該講唔吉利嘅說話,所以功夫茶今日盡量收斂一下,唔用同個「四」字諧音嘅字,雖然其實心中難免有氣。究竟功夫茶想講乜嘢呢?即係咁,菲律賓人質事件發生咗三年有多嘞,特區政府拖拖拉拉終於喺農曆新年之前推出制裁方案。哈,面對香港人要求討回公道嘅怒氣,呢一個賓賓政權居然繼續耍賴皮。菲律賓政府發言人話喎,香港嘅制裁措施係「不幸」同「遺憾」,重申不考慮就人質事件正式道歉。

香港對菲律賓嘅制裁措施係咁嘅,特首梁振英宣布,下月五日開始,香港會暫停菲律賓外交及公務護照持有人十四日免簽證訪港安排,作為首階段制裁,受影響人數約七百至八百人。今次係香港首次向外國施行類似措施,事前已通知中國外交部,視乎情況發展不排除採取任何更有效措施。

根據梁振英嘅講法,自從三個月前喺印尼峇里島同菲律賓總統阿基諾三世會面之後,一直就人質事件提出四項訴求,即道歉、賠償、跟進犯錯官員以及保障旅客安全,菲方就其中三項訴求嘅回應大致正面及積極,但對當中最重要嘅道歉,菲方未能滿足,彼此存在實質分歧。

人質事件死者家屬及生還者終於等到港府採取行動,佢哋又點睇呢?有家屬認為「有做好過冇做」,如果菲方再冇正面回應,應該倣效台灣政府經濟制裁菲律賓。亦有生還者指出,港府早於去年十一月已經講過,畀菲方一個月期限回應,現在拖咗三個月先至行動係太遲。

依照目前為止嘅事態發展而言,香港嘅制裁顯然力度不足,暫停菲律賓外交及公務護照持有人十四日免簽證訪港安排,對於習慣陰陰笑嘅三世祖阿基諾總統簡直係不痛不癢,佢大可以繼續陰陰笑,唔道歉就係唔道歉,話之你嬲到七竅生煙。

所以計功夫茶話齋,講多無謂,食多會滯,一於加碼制裁無賴啦,而且有必要狠狠地制裁到阿基諾之流嘅賓賓高官叫苦連天。台灣政府當日嘅重要經濟制裁手段之一,係針對菲律賓外傭,香港係唔係可以照辦煮碗呢?你知啦,菲傭在外地搵食係佢哋嘅重要經濟支柱,你針對呢一點制裁佢哋,先至會發揮到相應效果。

冇錯,新年流流唔應該講唔吉利嘅說話,功夫茶冇講過任何一個同「四」字諧音嘅字呀,不過如果菲律賓再唔道歉,制裁又唔加碼,過咗新年一定唔客氣!