好多人鍾意去歐洲旅行，志在欣賞嗰啲古色古香嘅歷史建築物，行街好似走入時光隧道，不知幾咁詩情畫意，又可以發思古之幽情，或者幻想自己係全副武裝嘅騎士，一手執韁，一手持矛，衝去古老城堡斬殺噴火巨龍，勇救被困閣樓嘅絕色美女。外地遊客到咗香港之後，能唔能夠搵到別具風味嘅歷史建築物呢？當然係唔能夠啦，事關好多古舊建築早就夷為平地再改建成商業大廈，即使有幸遇到一兩幢歷史悠久嘅唐樓，遊客亦有可能吐出三個英文字：OMG!
點解遊客會咁驚訝呢？原因係佢哋有機會見到一個非常詭異嘅場面，香港部分歷史建築物居然淪為色情場所，而且係專門招呼男同志嘅桑拿俱樂部。呢，本報記者去到太子道西一幢外貌古舊嘅三層高唐樓，見到一間裝修得相當優雅嘅店舖，睇落去似乎係咖啡室，原來裏面另有乾坤。
記者以顧客身份上去視察啦，店員馬上介紹場內設施，既有按摩池，亦有桑拿房，當日適逢其會更加係「大毛巾日」，顧客只可以用一條白色毛巾包裹重要部位。最令到記者大吃一驚嘅係，洗手間竟然掛咗一部平板電視，正在播放兩個男人嘅交歡片段，就算打咗格仔都難掩春光乍洩，肉慾橫流嘅露骨程度簡直令人嘩然。簡單咁講，男賓遇着男賓，大家賓至如歸。
桑拿俱樂部坐落嘅唐樓，根據古物諮詢委員會資料顯示，其實係一幢三級歷史建築物，早於一九三七年落成，即係有七十幾年歷史。三級歷史建築物專門招呼男同志，你話係咪大殺風景吖？唔通你幻想自己係騎士，衝去唐樓勇救毛巾包裹重要部位嘅麻甩佬咩！
同一幢歷史建築物喎，唔單止有令人想入非非嘅桑拿俱樂部，仲有等同於港式貧民窟嘅劏房，住客必須行樓梯上落，經過長年累月嘅不停踐踏，原本別具特色嘅木製樓梯已經破破爛爛。
好嘞，特區政府唔係講過會做好保育工作嘅咩？唔係話要將歷史建築活化嘅咩？點解唐樓居然會淪為疑似同志色情場所？講到尾咪又係官老爺冇心肝囉，一切都係欺世盜名嘅「假保育主義」。現時嘅歷史建築評級，其實只係屬於行政保護性質，並無法律約束力，物業權及發展權不受影響，業主若然唔願意配合，你完全吹佢唔脹。再加上政府缺乏支援，冇為業主提供足夠嘅誘因，人哋睬你都傻啦。
活化呢家嘢，唔可以崇尚空談，一定要實牙實齒，否則將會不倫不類。政府如果再唔諗辦法推動保育工作，歷史建築物遲早烏煙瘴氣！