國之將亡，必有妖孽。人稱「每周一鑊」嘅前食衞局局長周一嶽，為官渾渾噩噩，醜聞多多，早就成為過街老鼠，估唔到威爾斯親王醫院為咗擦呢位過街老鼠嘅鞋，居然將佢嘅隨口噏當秘笈，害到人質慘劇傷者易小玲三年來飽受煎熬，簡直離晒大譜！
曾任易小玲主診醫生嘅前中大整形外科教授博昂志日前踢爆威院以行政干預醫療，因為周一嶽探病時隨口講過兩星期內唔使再做手術，威院為免令呢位所謂嘅「政治人物」尷尬，明知易小玲首次手術後傷口受感染，仍拒絕安排第二次手術補救，引起社會一片嘩然。正如立法會議員黃毓民質疑，周一嶽簡直無腦，佢當年身為局長，唔係整形外科醫生，點知易小玲幾時要做手術？又憑咩亂咁講嘢？
冇錯嘞，點樣治療病人，幾時進行手術，完全係醫院嘅事務，關周一嶽底事咩！佢為咗做騷而口出狂言，亂噏廿四，害到易小玲三年來接受三十三次手術均告失敗，唔只精神及肉體飽受折磨，亦浪費大量時間及金錢，佢賠唔賠得起吖？即係咁，周一嶽係成件事嘅始作俑者，固然罪無可恕，而威院管理層「錯摸上意」，將高官面子睇得比病人利益更加重要，同樣難辭其咎。
所以話，庸官禍港殃民，害人害物，真係冇講錯。前朝政府混帳，畀周一嶽做咗八年問責局長，搞到一塌糊塗，烏煙瘴氣，本來以為改朝換代，呢啲爛電池應該丟入堆填區喇，點知現屆政府有眼無珠，竟然翻閹周一嶽做平機會主席，簡直匪夷所思。
試諗吓，周一嶽既無腦又無料，連自己都未顧得掂，何德何能為港人製造平等機會呢？早前中央打左燈向右轉，呢頭拒絕向王維基發出免費電視牌照，嗰頭中移動又將擁有流動電視頻譜嘅子公司賣畀王維基，自相矛盾，令港府無所適從；估唔到港府自己亦係咁，口口聲聲「穩中求變、適度有為」，結果濫竽充數，連周一嶽呢啲廢官都獲得重用，你話究竟點樣求變，點樣有為吖？嗱，有為就冇喇，周一嶽佗衰家就有，而且唔止佗衰平機會，仲佗衰埋港府甚至全香港添吖！
黃台之瓜，何堪再摘，家陣香港已經七國咁亂，民怨沸騰，港府唔諗辦法撥亂反正，反而搵一個爛電池嚟添煩添亂，直頭係自取其辱。正所謂，人貴有自知之明，周一嶽劣迹斑斑，千夫所指，如果佢仲有少少羞恥之心，就應該自動消失，唔好再留喺度獻世喇。咪話功夫茶唔提醒吖，如果你繼續賴死唔走，盞搞到七一遊行又多一批人嘅咋！