提起移民潮，大家應該記得回歸前嗰種墟冚場面，當時好多市民對香港前途冇信心，紛紛以腳投票。回歸之後，香港馬照跑，舞照跳，五十年不變，吸引唔少遠走他方嘅港人紛紛回流。點知十六年後嘅今日，移民潮又再出現，究竟發生乜嘢事呢？
嗱，港人其中一個移民熱點就係台灣。近年赴台升學、工作及定居嘅港人都有所增加，搞到台灣當局要提高門檻，大幅增加港澳投資移民嘅金額，由現時五百萬元新台幣調高至一千萬元；另外，日後只有直系親屬及配偶擁有台灣戶籍嘅人至可以申請定居當地，比現時有兄弟姊妹及配偶父母擁有戶籍都可以申請，門檻更高。
無獨有偶，港人移民加拿大亦有回升趨勢，而且有咁啱得咁蹺，加拿大當局亦宣布修訂入籍法，新移民取得永久居留權後，必須六年內喺加國實際居住四年，至有資格申請入籍，比現時四年內住滿三年嘅限定明顯收緊咗；另外，申請者須提供稅單作證明，日後想偷雞都唔得咯。
台灣同加拿大不約而同提高移民門檻，唔使問阿貴，梗係同愈來愈多港人移民有關喇。正所謂，人望高處，水向低流，香港移民人數上升，的確值得大家深思，問題究竟出喺邊度呢？有資格移民嘅人，唔係有錢人家，就係專業人士，佢哋對本港冇信心，肥水流向別人田，對本港經濟及社會嘅衝擊可大可小。大家應該仲記得，九七移民潮最高峰時期，連點心師傅都成為外國搶手貨，香港嘅地道點心風味幾乎跟埋移民去外國，香港人都唔想見到金融中心有朝一日搬去台灣。
其實，有因必有果，香港本來係福地，香港人再次萌起移民念頭，絕對唔係無緣無故嘅。回歸十六年來，香港經濟低迷，民生凋敝，樓價、物價、租金、工作壓力樣樣飆升，唯獨工資冇乜升到，市民生活艱難，日子難過，用腳投票都係人之常情啫。尤其近年乜都政治化，社會吵吵鬧鬧，無日安寧，好多人感到厭倦，想去外面呼吸新鮮空氣，更加係不足為奇喇。嗱，今年係政改年，政治爭拗勢必愈演愈烈，萬一搞到社會混亂，動盪不安，「佔領中環」唔使搞都得嘞，到時移民潮更加澎湃，中環隨時變咗死城吖！
香港是我家，香港靠大家。如果大家唔想香港人人雞飛狗走，係時候反思嘞，唔通真係想香港變成泰國，一拍兩散咩。當年有一則笑話係咁講嘅，因為移民者眾，啟德機場出境大堂貼咗一張告示，提醒最後一個離開香港嘅人臨走熄燈，以免嘥電。其實，呢則只係笑話，若然香港繼續沉淪，平民百姓根本無得走，只能坐困愁城，聽天由命。