正所謂咯喎，年關難過年年過，說明挨年近晚確係一個難關，因為人人等錢使，冇錢過年好慘情。如果你係單身一族，年關仲包括父母關，你可能要「租個女朋友」或者「租個男朋友」向家人交代，扮都扮到自己情路唔係咁坎坷。
正人君子過年關大不了賒賒借借，若然係心術不正嘅壞分子，過年關就會不擇手段，分分鐘做出傷天害理嘅事。冇耐前之嘛，東莞萬江鎮有一個三歲女童離奇失蹤，父親被勒索三萬元贖金。警方後來救出被綁架嘅肉參，並且拘捕二十七歲陳姓男子，綁匪供稱因為年關之前搵唔到工作，身上嘅錢所餘無幾，所以萌生綁架勒索嘅邪惡念頭。
另外，湖南平陽水頭鎮警方展開掃黃行動，賓館之內捉到三個涉嫌介紹及組織賣淫嘅男子，仲有兩名妓女以及一名嫖客。警方發現三人係民工，賣淫女子係女朋友，佢哋因為買唔到回鄉火車票，買機票又唔夠錢，所以要求女朋友接客賺錢。
如果你以為作奸犯科搵錢過年關只會出現於內地，你就大錯特錯嘞，事關唔少來自內地嘅扒手集團已經透過個人遊專程來港犯案。近日手機瘋傳一則消息，話旺角花園街一帶有一班內地扒手黨，通常由女賊扮家長，抱住小童作為掩眼法，由小童打開目標人物嘅手袋偷走財物，或者伸手入受害者衫袋褲袋偷走銀包同手機。抱小童扮家長嘅作用係有藉口甩身，萬一唔覺意失手被發現，女賊會即時講句對唔住，訛稱細路哥手多多，然後三十六計走為上計。
為咗驗證手機瘋傳嘅消息流定堅，本報記者去到花園街實地視察，結果有唔少擺攤搵食嘅檔主證實，確係有操一口流利普通話嘅扒手光顧。有部分文雀喬裝講價，聲東擊西之後偷走檔主嘅錢；亦有人表示，親眼見過懷疑扒竊事件，反映情況相當猖獗。有店員更加曾經截獲一名懷疑接贓嘅內地孕婦，對方一度跪地求饒。
好明顯嘞，手機瘋傳嘅消息唔係流嘢，最低限度，空穴來風，未必無因。各位親愛嘅香港市民，記住記住，小心扒手！
話時話，大家知唔知扒手點解會有「三隻手」嘅外號？首先當然係因為佢哋真係好似有第三隻手，神不知鬼不覺就能夠施展妙手空空嘅扒竊絕技，其次咯喎，「扒手」兩字又可以寫成「掱手」，望文生義當然係三隻手啦。
所以大家對於手機瘋傳嘅消息最好保持一個態度，寧可信其有，不可信其無，打醒十二分精神保存個人物品。至於負責撲滅罪行嘅警方，麻煩各位師兄師姐做好保障市民利益嘅工作，過年前後緊密巡邏，尤其針對人山人海嘅旺區，必須發揮金睛火眼嘅緝盜功能，唔容許扒竊集團如入無人之境！