唔滾唔知身體好，唔賭唔知時運高，對於唔少藉口多多嘅病態賭徒而言，有賭未為輸，結果搞到自己傾家蕩產，有時甚至係家破人亡。所以咯喎，香港法例明文禁賭，唯一例外係容許馬會開設博彩環節，賭下馬仔或者買下六合彩，大前提係博彩環節唔會輸到欠下一屁股債，大耳窿唔會搵上門喊打喊殺。
既然香港法例明文禁賭，開設賭場當然係罪大惡極啦。好衰唔衰香港有太多蠱惑仔，你有張良計，佢有過牆梯，千方百計暗中開賭，引無數英雄競折腰，折腰折得多隨時折福兼折墮。
佐敦吳松街有一個位於地庫嘅電子遊戲機中心喎，日光日白嘅時候就奉公守法正常運作，客人只可以打機耍樂，之但係一到夜晚十二點馬上變得古靈精怪，十足十澳門賭場咁嘅款。
警方大概一星期之前接獲線報，懷疑呢一個電子遊戲機中心夜後別有洞天，喺特別時段經營非法賭場。警方派探員放蛇收集線索，發現機舖被黑幫操控，午夜時分開始接受相熟會員賭真銀。機舖裏面有二十幾部角子老虎機以及六部釣魚機，會員卡有儲值功能，以一百元等於一萬分為一個單位，賭徒以現金購入遊戲儲值卡，換成代幣之後打機，贏得嘅分數會儲存於卡內，喺特別時段可以將積分兌換回現金。簡單咁講，客人變相以現金賭博。
開賭嘅好處係必賺無疑，所以賭場金句有云，唔怕你精，唔怕你呆，只怕你唔來。呢一間蠱惑賭場賺幾多錢呢？巴閉咯，佢哋會抽水一成，例如賭客兌回一千元現金，賭場就抽一百元，由於晚晚客似雲來全場爆滿，不法分子平均日賺十萬元，每個月穩袋三百萬。於是乎，警方直搗黃龍，總共拘捕四十人，包括五名職員以及一眾男女賭徒。
計功夫茶話齋，警方搗破蠱惑機舖係絕對正確，問題係香港仲有冇其他不為人知嘅地下賭場呢？你知啦，道高一尺，魔高一丈，蠱惑仔有時確係狡詐到冇朋友，萬一地下賭場遍地開花，荼毒之深肯定手尾長。
舉一個例子吖，香港買六合彩就話無傷大雅啫，內地以香港六合彩為根據所開嘅賭局就得人驚嘞，賭仔隨時輸身家之餘仲要連命仔都冇埋。偏偏香港又有人助紂為虐喎，印製六合彩報提供所謂嘅貼士，偷運去內地為禍人間，害到唔少人泥足深陷無法自拔。
所以話啫，今次破獲蠱惑機舖變賭場雖然叻仔，但係未夠呀，警方必須雷厲風行繼續禁賭，若然放軟手腳打擊不嚴，病態賭徒好可能累人累物累街坊，執法者都要負上失職嘅責任！