花開富貴獻新猷，東網資訊冠全球。今日大年初二，係開年嘅大日子，功夫茶恭祝各位讀者龍馬精神，萬事勝意。話明係開年，東方報業集團旗艦網站「on.cc東網」當然有新鮮猛料益大家喇！
東網力臻完善，打造全球華人最強資訊網，成立短短兩個幾月咋，成績已有目共睹，其中《太陽報電子報》、《好報電子報》網頁及手機App嘅下載頁次，已經突破一日二百萬，唔到你唔服。網民熱烈捧場，東網全力以赴，今日再踏出第二步，強勢推出歷來最強陣容嘅台灣評論版，廣邀寶島政要撰稿，務求從多角度為讀者提供深入嘅社會及時事分析，幫助全球華人掌握台灣政局及兩岸形勢。
台灣評論版嘅陣容究竟有幾強？功夫茶可以用四個字形容：粒粒皆星。打頭炮嘅係台灣立法院副院長、國民黨副主席洪秀柱，呢位女中豪傑問政風格夠晒潑辣，質詢官員同政敵從來不留情面，有「小辣椒」之稱，佢嘅評論文如其人，一定令大家拍案叫絕。另一位重量級撰稿人大家一定非常熟悉，佢就係有「爆料天王」之稱嘅前立法委員、現任台灣經濟研究院董事邱毅嘞，佢當年踢爆扁家弊案，喺台灣掀起一場政壇龍捲風，呢次喺東網撰文，堅料、猛料、爆料一定唔少得，各位千祈唔好錯過吖。
藍營有猛人，綠營亦唔弱。東網邀得民進黨新星、民意支持度極高嘅立委林佳龍撰文，佢已經宣布參選今年台中市市長，而且勝選呼聲極高，各位想了解台灣最新選情，上東網保證有收穫。當然喇，講到綠營，又點少得民進黨重量級人物、高雄市市長陳菊，呢位一向敢作敢為、言詞犀利嘅政壇女將，已答應為東網撰稿，目前正落實具體供稿時間，敬請大家留意。仲有吖，立委江啟臣、姚文智、黃偉哲等人亦會喺東網同大家見面，精彩可期。
一句講晒，台灣評論版強大陣容前所未見，今日起全球讀者只要登入東網，就可以隨時隨地閱讀呢啲分量十足嘅專欄。電腦網頁方面，讀者登入東網後，按左邊Menu Bar評論欄內嘅「台灣」就搞掂；手機方面，只要打開「東網港澳」App，點選上方Menu Bar嘅「評論」，再按「台灣評論」選項，重量級文章一覽無遺。喺度順便提提各位，手機版仲設有夜讀模式，係咪好周到呢！
功夫茶早就講過，東網嘅宗旨係立足香港，服務全球，所以，我哋會因應唔同地區讀者需要，推出唔同版本，提供最地道、最詳盡、最全面嘅資訊。除咗台灣版，東網大陸版亦正醞釀中，好快就會同大家見面嘅喇！