曾蔭權之所以被稱為貪曾，原因係呢一個擁有爵士銜頭嘅前特首確係貪得無厭，大有大貪，細有細貪，連人哋送畀香港特別行政區政府嘅賀禮都要貪一貪，卸任之前老謀深算據為己有。
貪曾喺舊年六月執包袱準備滾蛋嘅時候，委託搬運公司處理最少十箱合共六十瓶「香港回歸十年紀念珍藏」貴州茅台酒，從禮賓府運去位於堅尼地道嘅前任行政長官辦公室。呢一批名貴茅台酒原本係內地一間茅台酒公司送出，受禮一方應該係特區政府，總數有二百八十八瓶。根據當時嘅市價，同款茅台酒一瓶二萬八千八百元，六十瓶即係總值接近一百八十萬元。貪曾將六十瓶當作囊中物運走，其餘二百幾瓶總值六百萬元嘅茅台酒去咗邊呢？政府一直冇清晰解答。
無論如何，貪曾將一批名貴茅台酒鬼鬼祟祟運走係鐵一般嘅事實。點不知，運走嘅酒原來唔止六十瓶，係超過一百瓶！
最近又有傳媒揭發，貪曾今年七月以「沒必要保留備用」為由，將超過一百支酒偷偷送返去禮賓府。特首辦證實，曾蔭權一共運走咗百幾支因特首公職而獲贈嘅酒，並且喺一年多以來，基於公務用途而消耗咗六瓶餐酒以及一瓶烈酒。
好嘞，如果大家心水夠清，一定記得今年七月前後發生過乜嘢事。冇錯，就喺呢一段時間，前廉政專員湯顯明被揭發以公帑買烈酒醜聞，事件引起公眾高度關注。眼見貪杯好酒嘅湯顯明東窗事發，係咪有人作賊心虛，所以將百幾支酒物歸原主呢？正如立法會政府帳目委員會副主席謝偉俊話齋，曾蔭權喺今年七月將百幾支酒運回禮賓府，反映當初係「拿走不應該拿的酒」，政府必須解釋為何當初將咁多支酒運去前任特首辦。
簡單咁講，公眾絕對有理由懷疑貪曾中飽私囊，以非常奸蟊嘅手法私吞茅台。如果唔係貪湯浪費公帑買茅台奉客而犯眾怒，恐怕貪曾唔介意繼續將呢一批名貴國酒私有化。
所以話啫，曾蔭權實實在在係本地官場貪字輩之中嘅佼佼者，如果封佢為貪字輩二號，冇人夠資格做貪字輩一號。
講到呢度，功夫茶同大家研究一個問題，假設有賊佬入屋行竊，之後唔知點解將贓物送返去原璧歸趙，咁係咪可以將犯法嘅罪行一筆勾銷？根據依法治港嘅法治精神而言，物歸原主唔代表冇事發生，情況就好比前政務司司長唐英年，僭建地下行宮之後雖然將偷取而來嘅空間填平，唔代表身家清白喎，照樣要面臨法律制裁。
所以咯喎，麻煩廉政專員公署秉公辦理，盡快修理呢一個官場蟊躉！