雖然天氣仍然有少少熱，不過理論上家陣已經接近深秋，屬於秋風秋雨愁煞人嘅季節。秋天冇錯係好多人心目中一年裏面最美好嘅季節，不過天氣一涼就容易生病，你都咪話唔愁。
少年就話不識愁滋味啫，香港人經歷過咁多次疫症嘅無情考驗，絕對知道呢一個愁字點樣寫。呢嗱嗱嗱，有一則消息值得各位好好關注，關注完仲要小心小心再小心，畢竟生命非常寶貴，而且冇辦法回到過去重寫歷史。
值得關心嘅消息係咁樣，香港衞生署衞生防護中心接獲內地通報，浙江省新增一宗人類感染甲型禽流感（H7N9）病毒個案。感染者係一名三十五歲男子，現正於醫院接受治療，目前病情嚴重。
嗱，唔講得笑，呢單係浙江省四月底以來再次發現確診病例，證實禽流感威脅一直揮之不去。小數怕長計，內地至今共確診一百三十幾宗人類感染甲型禽流感個案，由南到北，遍布中國，其中浙江有四十七宗，上海亦有三十三宗。本港衞生署發言人係咁講嘅，衞生防護中心密切監察有關情況，與內地衞生當局緊密聯繫以了解詳情，並且會密切留意世界衞生組織嘅最新建議。
大家唔好話功夫茶杞人憂天，即使係一宗新增感染個案咁大把，而且患者身處之地係相對遙遠嘅浙江省，香港仍然有必要打醒十二分精神o架。你知啦，內地同胞來港旅遊公幹愈來愈多，中港交往頻繁到極，一個唔覺意有人感染病毒而將禽流感帶入境點算呢？歷歷在目嘅慘痛教訓當然係十年前嘅沙士瘟疫啦，衞生官僚連番失誤把關不嚴，病毒四散卒之搞到雞毛鴨血，二百九十九人魂歸天國，連醫生護士都要壯烈殉職呀。十年生死兩茫茫，不思量，自難忘，家陣內地又話有人確診患上禽流感喎，你話唔擔心就假嘞。
以目前嘅情況判斷，唯一比較放心嘅係食衞局局長已經唔係周一嶽，而係變咗民望相對較高嘅高永文。你知啦，周一嶽在位期間孭完一鑊又一鑊，假如仍然由周一鑊負責把關，就算病毒未殺到埋身，已經嚇死唔少細胞啦。高永文之所以民望唔算太差，無他嘅，上任以來嘅表現中規中矩吖嘛，起碼冇鬧出酒後駕駛或囤地自肥嘅醜聞。
不如咁講啦，過去十年以來本地衞生官僚有一個通病，就係對病毒太仁慈，變相對市民太殘忍。若然香港又不幸被禽流感攻陷，功夫茶強烈建議將港產官僚送去打針！