僭建僭建再僭建，違規違規又違規。達官貴人僭建，土豪劣紳僭建，阿貓阿狗僭建，香港嘅僭建情況未必多得過天上繁星，畢竟本地光害世界第一，星星能見度往往等於零，不過僭建物嘅數量應該同最近入侵屯門嘅烏蠅差不多。
違規僭建物嘅存在，大家都知道危機重重，一個唔小心隨時死人冧樓o架，若然僭建出現於劏房，燒通頂而逃生無門死傷枕藉都有之。
好嘞，今日功夫茶同大家關注一下灣仔謝斐道，原因係區內有一種大隱隱於市嘅「秘密食堂」。即係咁，熙來攘往嘅謝斐道食肆林立，可惜租金高昂，有部分食肆為咗招呼更多食客增加收入，竟然喺店舖側面嘅橫巷僭建出額外空間，並且喺面向大街嘅一邊裝上鐵閘掩人耳目。例如介乎盧押道同柯布連道之間嘅一段謝斐道，最少有兩間食肆以呢一種手法經營，睇似落咗閘嘅街舖，實際上內有乾坤，裏面係利用霸佔官地而造成嘅擴張營業。
本報記者實地了解過情況，食肆側門通向橫巷嘅秘密食堂之內，擺放咗大概十張餐枱，可以容納三十名食客。僭建空間設備相當齊全，既有風扇，亦有空調，其中一間連電視機都有，秘密食堂頂部以伸縮帆布簷篷建成。就算係食客都唔知自己其實身處橫巷，其中一位恍然大悟之後係咁講嘅：「咁樣僭建都得？一間係咁，兩間係咁，政府係咪要成條街嘅橫巷都變晒舖先肯做嘢？」
更加荒謬嘅係，部分舖位早於十年前已經被屋宇署揭發違規僭建，兩年前經本報報道之後一度被取締，但最近又借屍還魂。換言之，食肆老闆視法例如無物，僭完又拆，拆完又僭，屋宇署竟然慢條斯理放之任之。屋宇署話喎，調查需時，未能回應。
講到食肆僭建害死人，最恐怖嘅經歷莫過於○八年嘅「六月飛箱」，當年六月二十八日，灣仔道有一個違規建造又已經霉霉爛爛嘅招牌箱突然跌落街，失驚無神將一位無辜女途人壓死，死狀仲要係血肉模糊嗰隻。
喂，食肆僭建打造秘密食堂，一來係十分霸道嘅行為，二來咯喎，有機會搞出人命。誠如香港公正行技術總監賴達明話齋：「僭完又拆、拆完又僭會進一步破壞大廈外牆結構，甚至搞到喉管滲水，石屎鋼筋都會鬆脫，增加倒塌風險。」賴達明指出，唔少違規建造嘅簷篷質素參差，突然倒塌嘅情況相當普遍，認為屋宇署應該加強取締。
其實道理一字咁淺，屋宇署對於規管食肆僭建有不可推卸嘅責任，若然對違例者仁慈，即係對小市民殘忍，懶理僭建物構成嘅危險係助紂為虐，非常不人道o架！