唔認唔認終須認，前特首曾蔭權爵士乞求私見教宗嘅「魔鬼交易」被踢爆之後，港產官僚一直詐傻扮懵，一問三不知，直到前日，律政司先至發出一份新聞稿交代事件，變相證實魔鬼交易確實存在。可惜吖，當局欲語還休，講啲唔講啲，結果唔單只冇澄清公眾疑慮，反而留低更多疑團添。
律政司點樣講呢？犀利咯，呢篇長達一千七百幾字嘅新聞稿洋洋灑灑，詳列○六年七月至今年八月期間，律政司處理意大利當局要求港府協助調查前總理貝魯斯干尼案嘅過程，指時任香港駐歐盟特派代表栢志高，○七年十月向當時嘅律政司署理國際法律專員陸少冰尋求指示，聲稱意大利參議員Gregorio同佢接觸過，查詢意方向港府索取貝魯斯干尼案資料嘅「執行情況」。最奇怪嘅係，新聞稿指時任律政司司長黃仁龍唔知情喎，你信唔信吖？
嗱，大家不妨聽聽另一個版本。該名意大利參議員日前供稱，栢志高曾向佢表示，已向黃仁龍轉達阻撓移交資料嘅要求。咁就好笑喇，一個話黃仁龍唔知情，一個就話已向黃仁龍轉達要求，擺明有人講大話啫，究竟信邊個好呢？正如有立法會議員話齋，事件涉及極為敏感嘅政治、外交及司法獨立問題，當時身為律政司司長嘅黃仁龍無理由唔知情o架。換句話講，港府靠得住，豬乸會上樹！
仲有一樣嘢令人莫名其妙，律政司新聞稿居然隻字不提貪曾喺事件中嘅角色，好似完全唔關佢事咁，問你服未。係人都知，貪曾正正係呢單魔鬼交易嘅始作俑者，當局刻意唔提男主角，既唔合情亦唔合理，粗俗啲講係無私顯見私，文雅啲講係欲蓋彌彰。
不可不知，呢單魔鬼交易涉及干預司法，性質比貪曾「貪遍省港澳、歎盡海陸空」更加醜陋，更加惡劣，如果當局以為「唧牙膏」回應就可以過關，咁就實在太天真喇。有立法會議員要求特首梁振英責成貪曾、黃仁龍及栢志高三位主角，公開向公眾詳細交代事件，否則將會動議引用特權法調查。咁就啱嘞，魔鬼交易唔只涉嫌干預司法，而且破壞香港國際形象，絕對唔可以就咁算數。呢，本報將今次事件歸納出七大疑團，呢啲疑團一日未澄清，當局就無法向市民交代。
講到尾，成件事都係因為貪曾而起，如果唔係佢貪慕虛榮，假公濟私，根本唔會搞出咁多風波。而最好笑嘅係，佢搞咁多嘢最後都係得個吉，「黃粱一枕夢成空，只恨無緣見教宗」，簡直自取其辱。計功夫茶話齋，慶父不死，魯難未已，貪曾不除，港難未止，貪曾案調查咗一年半有多，究竟查成點，廉署應該有個交代嘞啩！