淨係睇個題目，大家都應該知道發生乜嘢事。冇錯嘞，宣淫販賤嘅《爽報》壽終正寢，被迫收檔，呢啲咪叫天收囉，真係大快人心、人心大快o架！
壹淫媒話喎，下周一起停止出版香港免費報《爽報》，以整合香港印刷業務，令集團理順資源，專注於有利可圖嘅業務。大家應該仲記得，舊年《爽報》停刊晚版，剩番半條命，當時仲死撐話摺埋晚版係要集中火力於早版，直接與其他免費報紙競爭奪取市場佔有率，又話等早版賺到錢再搞晚版都唔遲。點知話口未完，依家連早版都摺埋添，真係笑死人。
喂，《爽報》獻世兩年就玩完，太過短癮啲啩？其實咁嘅下場一早就估到喇，《爽報》日日燒錢，出版咁耐燒咁耐，加上通街派都冇人要，咁搞法，就算淫賤黎識印銀紙都唔掂喇，何況佢除咗誨淫誨盜之外，根本唔識印銀紙，唔收檔至奇吖。
始終都係呢句，多行不義必自斃。《爽報》一味宣淫販賤，以為靠賣弄色情就可以吸引讀者，結果獻世冇幾耐就有二十幾件物品被評為不雅，就算大部分獲得影視處放生，亦有十一項票控紀錄，簡直係前冇古人，後冇來者。呢，曾經有十八個民間團體操上立法會，譴責《爽報》荼毒青少年，淫媒以民為敵，激起全城公憤，成為千夫所指，依家被天收都好正常啫。
所以話，有其父必有其子，壹淫媒誨淫誨盜，旗下嘅《爽報》當然亦唔例外喇。咁多年來，壹淫媒因違反《淫褻及不雅物品管制條例》而被判罰嘅案例多達一百二十八次，仲厚過電話簿。咁都未算，壹淫媒除咗宣淫販賤，仲係侵權慣犯添，十八年來盜用東方報業集團知識產權累計多達四十九次，向東方賠償或向法庭繳款合計一百三十萬元，其中《爽報》亦有份o架，簡直唔知個醜字點寫。
正如古人話齋，國之將亡，必有妖孽。本港傳媒生態一向非常健康，大家安分守己，良性競爭，從來唔會發生不問自取、不勞而獲嘅侵權醜聞，更加唔會發生賣弄色情、荼毒青少年嘅醜行，但自從壹淫媒出現之後，傳媒生態就變得烏煙瘴氣，七國咁亂。最離譜嘅係，壹淫媒搗亂香港不特止，連台灣亦唔放過，搞到當地民間團體群起抗議，淫賤黎淪為過街老鼠，卒之要賤賣電視台，敗退香港。
正所謂，人在做，天在看，《爽報》收檔，已為壹淫媒敲響喪鐘，睇淫賤黎仲可以橫行到幾時。總而言之，香港少咗一份淫賤免費報，社會少咗一分烏煙瘴氣，紙張用少啲，地球都輕鬆啲喇，係咪！