唔知大家知唔知，每個醫科畢業生都要讀《希波克拉底誓詞》，發誓為所有病人謀福祉。不過講係咁講咋，事實係同人唔同命，醫生為咗去私院搵真銀咯喎，就算公院病人開咗肚都要讓路，邊一類病人嘅福祉重要啲，仲使問咩。
係咁嘅，瑪麗醫院肝膽胰外科名醫被指喺監督一宗換肝手術途中，突然離開崗位三小時，而病人當時已被開肚，咁樣等埋醫生法，都咪話唔匪夷所思。點解涉事醫生一走了之？原來係為咗趕去私院為另一病人做手術。睇到喇，所謂人人生而平等喎，醫者父母心喎，講就好聽咯，呃人嘅啫。
最離譜係，事件被踢爆後，部門主管唔係向公眾道歉，反而極力護短，將所有責任推落執刀醫生身上，質疑點解唔自己進行手術或者搵其他醫生幫手喎，仲話涉事醫生只係兼職，肯留喺公院幫手已經好有熱誠，爭在未立像表彰咋，問你服未。
冇錯，私院病人的確需要照顧，但都要視乎緊急程度吖。正如有醫生話齋，換肝手術爭分奪秒，一般必須喺五至六小時內完成，否則屍肝可能要報廢，何況病人麻醉時間愈長，風險愈大，加上開肚容易受到感染，咁樣拖延手術係咪合理，搵真銀係咪大晒，醫者有冇仁心，大家心中有數喇。
面對群情洶湧，全城鬧爆，瑪麗醫院都知衰嘞，話會成立委員會調查喎，不過咪畀功夫茶批中，呢類調查都係應付民意走過場嘅咋。冇計喇，鬼叫香港醫患地位不對等咩，鬼叫醫生渴市唔憂做咩，鬼叫醫醫相護牢不可破咩，鬼叫你人窮志短冇錢入住私家醫院咩，淨係舊年嘅醫委會改革條例草案激起醫界極大反彈，就知呢座白色巨塔已成為一個非常自私嘅利益集團，難為港府前排仲沾沾自喜話已就條例草案同醫界達成共識，其實都係換湯不換藥，天平始終向醫界傾斜咯喎，又邊有公平可言吖。
一日最衰都係公營醫療人手不足喇。試諗吓，如果公院人手充足，醫生就唔使兩邊走，病人性命就唔使排優次，更唔會有呢單荒謬事件發生。所以話啫，今次手術最終順利完成係好彩咋，人手荒一日唔解決，隨時會有類似事件發生。咁當然，罪魁禍首始終係政府，明知醫護人手不足，仲要推卸公共醫療責任，大力催谷醫療產業，私家醫院出動重金挖角，結果咪搞到公院人手荒愈演愈烈，基層市民受害囉。
點講都好，公院十個茶煲七個蓋問題始終需要解決，一味挖東牆補西牆根本唔係辦法。港府自詡好打得，頂唔頂得住利益集團壓力，放寬引入海外醫生就係試金石嘞。