香港向來被視為女權天堂，睇吓林鄭月娥成為第一位女特首就知嘞，不過講到婦女福利咯喎，似乎名不副實，淨係接種預防女性疾病嘅疫苗咋，港府一味善財難捨，有冇再孤寒啲吖。
嗱，預防子宮頸癌疫苗自從十年前面世後，造福唔少婦女，亦為對抗呢種女性殺手病寫下重要一頁。你知喇，冇乜邊種癌症有疫苗可以預防，而且疫苗副作用輕微，好值得普及推廣o架。可惜吖，疫苗價錢唔平，冇千千聲都埋唔到單，港府係就係有透過關愛基金為基層婦女免費接種，但象徵大於實際，而且萬一疫苗缺貨，有錢都冇用嘅咋。
唔係講笑，有醫療集團本月中發出緊急通告，話收到藥廠通知子宮頸癌疫苗貨源緊絀，甚至連家計會都缺貨，唔少已注射第一或第二針嘅女士，隨時打唔到第三針，令之前兩針效果大減。衞生署亦證實美國藥廠供貨出現阻延，最快要十二月初先回復正常供應，都咪話唔令人煩惱，加上愈來愈多內地婦女來港接種疫苗，變相分薄資源，會唔會繼搶奶粉、搶床位、搶學位後再激起中港矛盾，真係冇人講得埋。
雖然話貨源短缺唔關政府嘅事，但如果由政府統籌大規模購買疫苗，點都會有效率啲。再講吖，現時本港每年有四百多名女性罹患子宮頸癌，過百名患者因此死亡，連已故天后梅艷芳都不能幸免，為全港女性免費接種疫苗，使費有限但效益好大，起碼減少咗女性因為呢隻病而使用公共醫療嘅機會，亦即係減輕公共醫療負擔，而女性少咗後顧之憂，對家庭及勞動市場又可以有更大貢獻，一舉多得，何樂而不為。台灣已有多個縣市為中學女生免費接種疫苗，點解港府唔學吓呢？
講起就把幾火，港府坐擁金山銀山，本來有錢好辦事，偏偏錙銖必較，搞到香港由教育到醫療、由扶貧到安老都問題多多。其實早就有政黨要求港府免費為婦女接種子宮頸癌疫苗、提供免費子宮頸細胞檢查同埋乳癌普查，點知新一份施政報告依然交白卷，唔失望就假。大家有眼見，港府呢頭用於假難民嘅開支，一年閒閒哋十幾億都唔肉赤，嗰頭對免費或資助接種疫苗一味耍手擰頭，呢啲咪叫假仁假義囉，咪就係手指拗出唔拗入囉。
最諷刺係，林鄭上台前口口聲聲要提升婦女地位，仲話要委任多啲女性加入管治班子，到頭來係點大家睇到喇。講真，免費提供疫苗係德政，冇人敢拉布反對，何況林鄭身為女性，對爭取婦女福利都唔加多兩錢肉緊，點都講唔通喇。