佔領之亂距今就快三年，呢場政治鬧劇除咗損害法治、撕裂社會，仲製造咗一班自以為造反有理嘅政治炮灰添。呢，尋日又有兩名學生領袖被提上法庭，雖然最終獲輕判，但始終留有一世案底，成為人生污點，你話為乜吖。
大家一定記得，舊年嘅圍堵港大校委會事件，場面亂過亂世佳人，大學生嗰種惡形惡相，嗰種無法無天，同街頭爛仔冇分別，時任港大學生會會長馮敬恩及外務副會長李峰琦尋日被判刑，前者公眾地方擾亂秩序行為罪成，另外承認刑事損壞等兩罪，三罪合共被判社服令二百四十小時；後者亦被裁定阻礙公職人員執行職務傳票罪成，被判二百小時社服令。
嗱，判社服令到底係恰當定係過輕，社會自有公論，不過馮李二人事後表現悔意，亦有主動認罪，總算比死撐唔認衰好，雖然有人質疑佢哋扮懺悔博甩身，但連被重點針對嘅校委會主席李國章都開口表示尊重法庭判決，咁大家亦不妨放長雙眼，睇吓兩位年輕人係咪真係改過自新喇。
咁講喇，唔少年輕人之所以開口「違法達義」，埋口「以武抗暴」，其實都係被無良政客洗腦，上面兩位後生仔某程度上都係政治歪風之下嘅受害者，係佔中嘅後遺症，「佔中害人，影響一生」，真係一啲都冇講錯o架。
嗱嗱嗱，過幾日就係佔中三周年，一班牛鬼蛇神隨時又舉幡招魂，無病呻吟一番，睇見都眼冤。最弊係佔中唔止鼓吹造反有理，仲衍生港獨，搞到大班年輕人好似鬼上身咁款，日日話要港獨。咪睇中大學生會終於死死氣拆除港獨橫額，其實條氣始終唔順，伺機又再嚟料嘅咋。所以話啫，佔中禍首一日唔落鑊，一日唔被重判，當局一日唔以儆效尤，社會亂象只會層出不窮，年輕人只會更膽大妄為，社會想回復清淨，難咯。
講起就激氣，佔中落幕咁耐，司法玩「捉放曹」就玩足咁耐，淨係嗰四十幾個佔中主要搞手咋，真正被起訴只有九個咁大把，被視為最大金主兼黑手嘅壹淫媒老闆黎智英至今毫髮未傷，而「政治主教」陳日君同「戴妖」戴耀廷等人繼續唯恐天下不亂，仲周不時出嚟講風涼話添。一班年輕人淪為政治炮灰，紛紛被判，但罪魁禍首就逍遙法外，律政司抓小放大，本末倒置，選擇性執法，所謂法律面前人人平等喎，呸！
解鈴還須繫鈴人，特首林鄭月娥尋日喺倫敦出席活動，口口聲聲法治係「一國兩制」賴以成功嘅基石，咁就唔該用行動證明香港法治未死，快啲將罪有應得嘅人繩之以法，咪一味姑息養奸吖。