廢紙圍城冇晒符 港府環保得把口

呢兩日大家出街打個白鴿轉,可能會驚見一個二個大大小小「垃圾山」,唔知嘅仲以為去咗第三世界國家,認真得人驚!

鬼咩,原來內地當局最近收緊廢紙進口標準以及審批程序,搞到廢紙無價無市頓變垃圾,九成回收商前日起停收廢紙一周,等港府同內地「傾掂數」先至復運內地。就係咁,香港即時面臨廢紙圍城嘅困局。其中上水有垃圾房側邊驚現五米紙皮路,旺角、深水埗情況亦唔好得幾多,部分檔主隨手將紙皮廢物拋出街外,簡直七國咁亂,可憐一班食環署外判清潔工做到有氣冇碇抖,廢紙清極都清唔晒,幾乎中暑咁滯。回收店亦呻到樹葉落,有做開紙皮回收生意嘅店舖負責人話,以往每日交十噸紙皮畀回收商,家陣回收商拒收,但租金同人工照畀,坐食山崩遲早關門大吉。

可惜吖,急驚風遇着慢郎中,旨意環保官僚同內地當局傾掂數就冇嘞,佢哋淨係撥出屯門環保園等地供業界免費暫存廢紙就當交咗功課。回收基金因應今次危機,冇錯係撥出二千萬元畀業界申請購買機器同提升回收產品質素,但杯水車薪,頂多甜吓個嘴嘅啫。有立法會議員鬧爆港府「hea住先」、「止唔到血」,就係咁解。

最離譜嘅係,官老爺幫唔到手不特止,反而話今次係業界轉型嘅大好機會,都唔知攞景定贈興。係人都知,一直以來內地係本港廢紙嘅主要出口地,比率超過九成,牛頭角順嫂都識講,雞蛋唔好放喺同一個籃入面,港府咁多年做過乜嘢幫業界擴闊客源?

仲有唔好唔記得,內地當局其實早喺一三年開始,已經限制洋垃圾進口,規定廢塑料入口前必須經過清洗、破碎等程序,當局係咪應該未雨綢繆,作幾手準備呢?正如環保人士話齋,世界上冇一個國家會歡迎垃圾進入境內,收緊回收物標準係國際大勢所趨,香港回收業繼續停留喺「打包」嘅原始階段,遲早被市場淘汰。本來呢,上述環保基金大拿拿有成十億銀,用得其所照計有助業界轉型,弊在審批程序鬼咁繁複,根本就好睇唔好食。

講開港府推廣回收,真係得啖笑。二十年前又係講三色回收桶,二十年後又係講三色桶,人哋南韓等地連廚餘都幾乎百分百再用,香港仲有冇落後啲吖?港產官僚實事做唔到,最叻向市民荷包開刀,搞垃圾徵費,你話香港地做官幾咁輕鬆。

廢紙圍城冇晒符,港府環保得把口。推廣環保係咁,安老政策亦係一樣,呢劑回收商拒收紙皮,拾荒長者即時手停口停,有人甚至話長此下去要回鄉養老,你話呢啲係咪香港之恥吖!