垃圾電影有金草莓獎，無厘頭發明有搞笑諾貝爾獎，咁如果航空界有最劣質服務獎，又會花落誰家？唔使問阿貴，梗係因管理不善而喺全球最佳航空公司排名節節下跌嘅國泰航空喇！
先睇吓一名苦主最近嘅慘痛經歷先喇。話說台灣女藝人劉致妤早前乘搭國泰航空班機由南京返台，原定喺香港轉機，點知因為飛機延誤要改搭另一航班，國泰為此送餐券畀佢，點知排完一大輪之後，至知原來餐券係過期嘅。女藝人事後投訴，慘被當作人球掟來掟去，最後惟有填寫意見書表達不滿。等咗個零禮拜，國泰終於回覆，一句道歉都冇不特止，仲話佢哋冇責任、冇直接義務賠償喎。睇到呢度，女藝人自然（慶）過辣雞，怒斥國泰將乘客當乞兒，仲憤言以後都唔會幫襯添。
店大欺客就聽得多啫，寸到店大玩客，就真係聞所未聞。正如事主所講，自己由頭到尾冇要求過國泰賠償，對方表達心意又送過期餐券，擺明玩嘢，仲要一句「冇義務賠償」撻埋嚟，講到好似係個客貪小便宜咁，真係唔嬲就假。
如果國泰管理層睇到女藝人上述心聲，相信一定呻笨，如果當初連過期餐券都慳番，咪唔使丟人現眼囉。你知喇，逢親超賣或者延誤要賠畀啲客，國泰例牌拖得就拖，再唔係就欺軟怕硬，邊個嘈勁啲邊個賠多啲。試過有個客搭國泰機由倫敦飛香港，因航班延誤滯留當地長達十六小時，對方一直唔肯負責膳食費，直到本報介入至死死地氣跪低。最離譜嘅係，原來根據歐盟規定，喺區內起飛嘅航班延誤超過四小時，旅客可獲六百歐元賠償，如果唔係客人主動問起，國泰又係側側膊唔多覺。
鬼咩，國泰delay多過食飯，下下要賠，識印銀紙都唔掂。之前英國一個專門提供旅遊數據嘅機構，比較全球超過一百間航空公司嘅準時度，結果發現國泰排名倒數第三位，國泰成日畀人插「廉航化」，家陣知點解喇。
大家有眼見，國泰服務質素不斷插水，有口皆悲，佢哋唔係改善管理，挽回顧客信心，反而一味諗縮數，機艙加位、減少清潔次數，無所不用其極，結果咪愈來愈趕客囉。國泰早排大裁員，資方誓神劈願話唔涉及機師以及機艙服務員，點知一個屈尾十就向機師嘅薪酬及退休金開刀，誠信破產。咁搞法會唔會影響航空安全，真係冇人話得埋，聰明嘅客人梗係懂得如何選擇。
百年養不足，一日毀有餘，幾代人辛苦經營嘅金漆招牌，短短幾年時間就打到殘晒，國泰係咁，成個香港何嘗唔係咁！