香港呢排唔知行咩衰運，短短幾日，先有年輕人懷疑斬死愛侶，再有十零歲細路擸刀劈細佬，勢估唔到連流行音樂會都樂極生悲，搞出人命，真係唔到你唔信邪！
話說西九文化區舉辦嘅Road to Ultra香港音樂節2017前日起開show，點知冇耐就出意外，先後有四人暈倒送院，其中一名廿七歲男子搶救後不治，另外二男一女就留醫深切治療部，警方在場檢獲毒品，唔排除有人喺場內吸毒，現正展開調查咁話。
冇錯，主辦單位係有做預防措施，但頂多都係喺社交媒體發文提醒入場人士唔好帶包括毒品、易燃物品以及攻擊性武器在內嘅違禁品。嘥氣喇，香港班後生仔真係咁聽教聽話，循規蹈矩，大學校園就唔會烏煙瘴氣，雞犬不寧。唔使講到take嘢咁嚴重，音樂會完場後遍地垃圾雜物，十足十打完核戰咁，難為有啲年輕人成日嘲笑「支那人」，好心照吓塊鏡先喇！
講番音樂會保安，其實真係相當求其嘅咋。入場嗰陣保安雖然會係咁意搜吓袋，但一到人潮高峰，只要觀眾有門票就一律放行，想話隨身帶違禁品入場話都冇咁易，有觀眾就話見到有人即場「開餐」，high到冇朋友，咁搞法有乜法子唔出事。
話時話，Road to Ultra音樂節舉辦多年以嚟，類似慘劇已經唔係第一次發生。幾年前喺美國，就有一名二十歲青年睇show期間，懷疑服用一種叫「浴鹽」嘅新興毒品致死，主辦單位咁都唔打醒十二分精神，堵塞漏洞，點都講唔過去喇。
主辦單位固然抵炳，租出場地嘅西九管理局更加唔抵爭。出事後佢哋第一時間大事化小，話死傷者係「中暑送院」，講到有咁輕鬆得咁輕鬆。喂，家陣連警方都話有待調查，西九管理局憑咩未審先判？管理局又強調主辦單位已根據合約要求，提供相關牌照及聘請保安人員控制人流，實際上等於將隻鑊卸畀主辦單位，仲有冇再不負責任啲吖。
一節見則百節知，西九文化區多災多難，起咗近十年仲係爛地一笪，公帑就好似進入黑洞咁不斷填氹，包括大劇院在內嘅第三期核心工程完工無期，都唔知點收科。反而洋總裁換人仲快過戲院換畫，成事不足，敗事有餘照逗高薪厚祿返祖家，冇你咁好氣，結果搞到「世界級文化樞紐」淪為「世界級笑話」，市民直頭冤過竇娥。
始終都係呢句，有時啲嘢真係唔到你唔信邪。西九話要搞故宮文化博物館，有人一早已經批死，中港台三地三個故宮，一國三宮，權力分散，唔天下大亂至奇。家陣港獨思潮沉渣泛起，證明果然好嘅唔靈醜嘅靈！