特首跑馬仔進入最後大直路，有人話候選人之一嘅鬍鬚曾民望只係虛火，實情係咪咁仲要睇過至知，之不過佢老哥財政司任內唯一「亮麗」政績嘅美食車，生意額高開低收，就真係名副其實嘅虛火嘞。
美食車今個農曆新年開波，或者因為有新鮮感啩，開頭幾日係威係勢，連鬍鬚曾都急不及待走去影相抽水，點知好快就無以為繼，旅遊事務署日前公布頭兩個星期成績表，金紫荊廣場同尖沙咀藝術廣場每日平均二百人，已經算係旺場，中環海濱以及九龍東一號場，分別只係得一百同一百五十人。有檔主表示，每日營運開支要成五千銀，但平時生意額多數得二、三千，最差甚至試過一千蚊都搵唔夠，第二日寧願唔開檔，話唔心翳係假嘅。
你知喇，美食車入場費大拿拿幾十萬，家陣洗濕咗個頭，梗要諗計救亡，有人推出魚蛋、燒賣一類地道美食，有人推出平價冬甩及雪糕吸客，甚至有人計劃兼營工廠大廈外賣幫補生計添。
咁就好笑嘞，美食車賣魚蛋燒賣，咁同傳統流動熟食走鬼檔有咩分別？要知道，一架木頭手推車，幾百一千有找，入場門檻比美食車低得多之餘，又食正港人集體回憶條水，近年愈來愈多人主張開設熟食夜市，咪就係咁解囉。
講到呢度，功夫茶不妨同大家溫故知新。話說當年鬍鬚曾睇咗套美國電影，當中講述擔任知名餐廳主廚嘅男主角被人炒魷，惟有開設快餐車證明自己實力，覺得故事「好有趣」，於是就諗到將美食車引入香港。佢老哥拍拍腦袋話都冇咁易，剩低嘅細節全部掟晒畀下屬搞，當時主事官員淨係對熱狗漢堡包情有獨鍾，對豬皮蘿蔔一類土炮不屑一顧，已經引發唔少爭議。毛伯伯一早就教落，洋為中用，古為今用，取其精華，去其糟粕，港產官僚一味硬搬外國經驗，結果咪搞成咁囉。
所以話，港產官僚真係堅離地o架。人哋美國地方大，美食車可以去得偏遠少少，做餐廳做唔到嘅客，加上美食車唔使舖租，食物價格可以做到好平，自然有競爭力。香港就唔同啦，周圍都係食肆，市民行兩步就醫到肚，尤其係唔少顧客反映價錢唔平，賣個菠蘿包都要收廿皮，連鬍鬚曾咁「中產」都嫌貴，再咁落去睇怕都幾難做得住。
講開鬍鬚曾，佢老哥話現階段專注當選後嘅工作，冇諗過輸咗會點。計功夫茶話齋，鬍鬚曾萬一鎩羽敗陣，最應該去做美食車大使，成壇嘢佢搞出嚟，無理由拍拍籮柚關人個關啫，下話！