百足之蟲死不僵 犁庭掃穴莫手軟

今時今日中港矛盾咁尖銳,好多人一聽到兩地合作即刻成個彈起,不過凡事都有例外,講到兩地合作打擊犯罪集團,保障民眾生命財產咯喎,係人都舉腳贊成喇!

功夫茶講緊嘅係為期半年、由粵港澳三地警方參與嘅「雷霆17」大型聯合反罪惡行動。行動啱啱開波已經建功,香港O記同廣東省公安邊防總隊合作瓦解一個跨境串謀詐騙及偷運人蛇集團,拘捕多名中港嫌犯,懷疑集團利用假文件協助內地人申請英國旅遊簽證,估計獲利超過四百萬元人民幣。聽聞兩地警方舊年十月收到線報,放長線釣大魚,到近日終於採取行動。

話時話,自香港同澳門回歸之後,粵港澳三地警方已先後組織多個專項聯合行動,之後更加以「雷霆」加年份作為恒常嘅聯合行動代號,近年更有公安部官員南下坐鎮指揮添。

今年「雷霆」行動比較特別,由往常下半年舉行,提早四個月至依家開鑼,聰明嘅讀者應該估到,香港回歸二十周年在即,肯定有唔少活動,國家領導人將會出席各類慶典,為維護內部保安同治安需要,有必要洗靚個太平地,喺咁嘅情況下,跨境「打黑除惡」,斬斷黑幫財路,自然成為重中之重。

咁又係吖,有朋自遠方來,梗係要灑掃庭院以待賓客,執到屋企乾乾淨淨,如果蛇蟲鼠蟻蒲晒面,你話幾咁失禮。特別如果嗰位賓客係領導人,就更加不容有失喇。

當然,講到打擊跨境犯罪,淨係洗太平地嘅運動式執法係唔夠嘅。好似內地公安咁吖,每隔一排都會進行嚴打行動,犯罪分子唔蠢,風頭火勢梗係潛一輪水先,之後風聲冇咁緊,咪又係故態復萌。

事實擺在眼前,「雷霆行動」成為恒常機制,本身就足以證明犯罪分子好似百足之蟲咁,死而不僵。好似舊年行動咁,左手捉拿內地邊防、警隊中勾黑營私嘅腐敗分子,斬斷販運人蛇黑幫嘅保護傘;右手重錘打擊肆虐粵港嘅跨境偷運南亞人蛇集團,結果成效顯著,淨係本港警方就成功拘捕多名人蛇集團骨幹人物。人蛇滾滾來,罪案密密爆,假難民無惡不作,搞到香港雞毛鴨血,呢方面工作固然唔可以畀佢停,近年中港跨境犯罪形式多樣化,電騙案以至爆竊、綁架兵團等等五花八門,全部都要靠兩地警方加強情報交流同執法方面合作。

始終都係嗰句,掃帚不到,灰塵照例不會自行跑掉,打擊犯罪係長期作戰,特別係香港警方前排醜聞多多,有口皆悲,更加應該做番齣好戲,用實際行動挽回市民嘅信心!