今日係愚人節，喺呢個可以「合理」整蠱人嘅日子，梗係唔好咁悶啦，盡情諗啲計仔整蠱吓朋友先！至於情侶們擔心會因此而激到對方嬲嬲豬，不妨送啲搞笑又充滿邪念嘅小禮物畀對方，包佢收到之後笑爆嘴，仲分分鐘挑起慾火同你執番劑添！
送件白色T恤會唔會太過求其？梗係唔會啦！因為呢件係由日本「不透底白T製作委員會」（透けない白T製作委員会）推出嘅「正裝白T」，絕對係將舒適同邪念合而為一。據委員會稱根據過往嘅調查發現，有超過8成嘅日本男女，每次着白Tee嘅時候，都會遇到透點嘅問題，因此佢哋用咗兩年時間開發呢件號稱「只要非完全濕水，否則絕對唔會透點」嘅白Tee。究竟係咪真係咁勁呢？有日本網絡媒體就搵咗個男人嚟做測試，佢哋先用按摩棒刺激測試者胸前兩點，再用情趣化妝水沾濕胸前，睇吓會唔會透點，結果又真係睇唔到喎！而男士們送呢件價值9,720日圓（約670港元）嘅白Tee做禮物，目的就係方便女友唔戴Bra都唔驚透點，以後出街咪可以着少件囉！正呀喂！
「大根」呢個詞語大家咪諗邪嘢，因為日文中嘅大根係指白蘿蔔，而人參則係指紅蘿蔔。呢個動作有啲猥瑣嘅赤赤白同紅蘿蔔，係由成立於1993年嘅音樂製作兼推動藝術發展嘅「音波屋」所製作。擅長利用樹脂黏土製作出各種逼真食材嘅佢哋，早前推出「性感～大根」及「性感～人參」系列。本嚟貌似裸體人形嘅赤赤白同紅蘿蔔，今次以更加性感嘅甫士勾起鹹味……唔係，係萌味！每個動作都有專屬系列名稱，好似有瞓地擘髀嘅「性感～舒展紅蘿蔔」、攬攬抱抱嘅「性感～一對野菜」，同埋畀人喺臀部插咗一支嘢嘅「性感~大根備忘錄夾」，售價由864至2,700日圓（約59至186港元）不等，數量有限，有買趁手。
產自北海道嘅「好想H朱古力」，一盒有12粒，每粒都按照男女性徵而製成，分別有巨乳牛奶朱古力、棒棒黑朱古力、超鹹濕嘅鮑魚朱古力同埋套套軟糖，盒內仲附有貼心嘅享用說明書，叫人先用舌頭細嘗巨乳朱古力，然後用舌尖感受巨乳嘅滋味，跟住再從棒棒頭開始細味棒棒朱古力，而舔完鮑魚朱古力後，再體驗打開套套軟糖包裝嘅樂趣。雖然佢哋嘅外形極具挑逗性，但據生產商Hokumin稱，原來呢種朱古力最初諗住作為「義理朱古力」，即係送畀非心儀異性嘅朱古力之用，之但係外形咁出位，叫人點相信呀！
吹氣公仔Mary個「Ｏ」形烈燄紅嘴，相信冇邊個唔識，但係做乜要送個Mary嘴畀人先？大家咪心邪住，皆因呢個並非用嚟喺床上吹奏用嘅情趣玩具，查實佢係一個叫做「Face Slimmer」嘅美容器，用法好簡單，女士只要將佢含喺嘴度，然後每日持續做3分鐘發音運動，即係反覆大聲讀出a-i-u-e-o呢幾個音出嚟，就可以緊緻法令紋，從而達到減齡效果。如果覺得呢個造型太過突出，可以用番元祖產品「Pupeko」，由平間智佳子發明，有助消除法令紋，絕對係呢類產品嘅先驅。不過女士們喺使用前，記得唔好畀男友睇到，否則勁樣衰！
呢條粉紅色嘅薑外形實在係太似青筋暴現嘅棒棒，其實佢係一支生薑造型嘅手燈嚟咋！勁愛生薑嘅岩下食品公司社長岩下和了，喺2015年6月於栃本縣開設嘅「岩下的新生薑博物館」，推出過唔少以薑為主題嘅周邊商品，不過喺各種商品中，卻以邪氣十足嘅生薑產品，每次都引嚟極大嘅話題性。如果大家有留意嘅話，就知道佢之前推出過嘅生薑掛飾，已經被人稱為極具色氣嘅產品。嚟到呢支手燈，獨特外形加上35厘米嘅長度，實在令人想入非非。不過其後岩下食品公司以「騷擾女性」為由，喺去年宣布停產。想入手，真係有啲難度。
撰文：魂