東網直播3連發過足睇波癮 2:30 R&F富力 冠忠南區搏甩髀
「中銀人壽香港超級聯賽」殺入最後直路，今日愚人節上演3場硬仗，on.cc東網均會全程直播，絕對唔係講笑！榜首東方龍獅下午5時30分於旺角場「作客」香港飛馬，將遇上前主帥楊正光「逆」主上演「無間道」！尾三的R&F富力下午2時30分於小西灣迎戰冠忠南區，包尾的港會則於晚上8時迎戰南華。分處第3、4位的「雙南」要為季後附加賽資格Fight到底，3場激戰各有睇頭，一於黐實東網睇好波！
R&F富力今季港超之旅僅餘下4輪賽事，這支球隊非但未能達成季前打入聯賽中上游的目標，目前仍以9分排在尾三，與榜尾的港會僅得3分之差，仍未脫離降班危機，今日頭場在小西灣運動場迎戰冠忠南區必須全力搶分，然而對於富力而言，似乎有一定難度。（on.cc東網周六下午2時30分直播）
卓耀國搶分Keyman
3連敗的R&F富力今季戰績令人失望，即使季中曾「換血」簽入梁子成、陳立明等具經驗的港將，對於球隊成績仍無太大幫助，尤其前線鋒力不夠銳利，16輪賽事僅攻入13球，只比火力最弱的港會稍多1球。前線球員普遍進攻乏力下，攻入7球、入球數超過全隊一半的港將卓耀國，自然成為今仗鬥南區搶分關鍵人物。
冠忠南區上仗以2比0擊敗和富大埔，一洗早前在各項賽事3場不勝的頹風，門將謝德謙認為早前在菁英盃4強出局，有助全軍認清現實，在餘下賽事踢得更認真，齊心打入三甲及奪得季後賽資格：「球隊已定下聯賽第3名為最終目標，季初失去亞洲賽資格，我們雖有不服，但倒不如自己堂堂正正，再將資格拿回來。」他認為富力的發揮雖未如理想，但球員有一定實力，南區亦不敢放鬆，務求盡取3分。冠忠南區今仗有翼鋒梁子駿復出，陸志豪則有望先列後備，預計由日援內田智也繼續任中場指揮官。