港產官僚冇嘢叻，最叻就係吹水唔抹嘴。咪睇佢哋成日將保育掛喺嘴唇邊，其實只係唸口黃咁唸，如果唔係，歷史建築就唔會拆吓一幢，拆吓又一幢喇！
冇錯嘞，功夫茶講緊嘅之唔係位於屯門、孫中山先生進行推翻滿清革命嘅基地紅樓囉。有立法會議員接獲紅樓居民求助，話早前收到業主通知要限期搬走。記者去現場睇過，附近一帶草叢已經被夷為平地，估計即將有大工程進行，而最令人痛心嘅係，除部分圍牆拆咗，大門兩邊柱上原有孫中山先生「天下為公」同「博愛」嘅墨迹都被抹去，唔通呢幢一級歷史建築真係難逃推土機下嘅厄運？
講起都幾諷刺，發展局高官早幾日至吹噓，話已經為超過一千三百幢歷史建築完成評級，又話鼓勵私人業主參與推動保育歷史建築，話口未完就發生紅樓呢單嘢，簡直係大巴大巴咁車埋去。
講真，港府保育葉公好龍，大家早就領教不少。同樣係一級歷史建築，位於深水埗欽州街，亦係本港碩果僅存嘅戰前廣州式騎樓建築物，最近就被投資者購入，改裝成劏房出租，搞到面目全非。鬼咩，負責歷史建築評級機制嘅古物諮詢委員會只係行政部門，並無法定權力，業主要改裝要清拆，一律悉隨尊便。港府幾年前公布過一份古蹟保育名單，當中唔少屬私人業權，結果拆得仲快過舊時，笑大人個口。
本來呢，建築物被列為法定古蹟，業主就唔能夠隨便清拆，問題係當中涉及賠償等問題，當局闊佬懶理，好多時都等到件事鬧大咗先至出手補鑊，何東花園被拆就係最典型例子。其實紅樓都係一樣，早喺一一年已有專家呼籲趁住辛亥革命一百周年，將紅樓「升呢」為法定古蹟，點知官老爺當耳邊風，咪搞成今日咁囉。
話時話，保育紅樓唔單止有歷史意義，更有現實需要。係人都知，紅樓嘅早期業主李紀堂係孫中山喺興中會嘅革命戰友，帶領革命黨起義嘅黃興，據講就住過喺紅樓。近幾年「港獨」、「去中國化」思潮沉渣泛起，港府成日話要透過歷史教育年輕人認識香港同中國嘅密切關係，紅樓正正係歷史嘅活見證，冇理由眼白白睇住拆卸吖！正所謂，唔睇僧面都睇佛面，連當今領導人都親口讚揚孫中山係「偉大嘅民族英雄、偉大嘅愛國主義者」，港產官僚應該知點做喇。
真係諗極都唔明，紅樓瀕危告急，港產官僚關人個關，反而被指保育價值唔高嘅舊政府總部西座，只因為鍍咗層殖民地時代嘅金，即刻變得如珠如寶。港府厚此薄彼，應保嘅唔保，唔應保嘅亂保，高官成日畀人話「黃皮白心」，戀英崇殖，家陣知點解喇！