港產官僚冇嘢叻，最叻就係玩語言偽術。呢，鴨脷洲利南道地皮啱啱先以超出市場估計近五成嘅一百六十多億港元成交，成為本港賣地史上最貴地王。正當大家擔心樓市升勢難以壓抑之際，發展局局長馬紹祥大派定心丸，話歷史紀錄顯示高價投地唔代表可以高價出售，樓盤推出時仍要視乎經濟環境同息率變化等，呢啲咪就係典型嘅語言偽術囉。
冇錯，以往金融風暴、沙士等等嘅經濟低迷時期，大圍市況轉差，的確有發展商試過蝕賣，但呢啲畢竟係個別例子。梗係喇，發展商大拿拿幾十以至上百億元買入地皮，梗係計過度過先至扑槌，點會死錯人㗎。呢嗱，打針冇咁快就見效，「新地王」鄰近屋苑連日來唔係大幅提高叫價，就係索性封盤，咪就係因為睇好後市囉。最頂癮嘅係，呢頭馬紹祥至話地價同樓價冇必然關係，嗰頭佢阿頭、財政司司長陳茂波就話「情況令人憂慮」，一個指東，一個指西，你話市民信邊個好吖？
其實道理一字咁淺啫，麵粉價愈貴，整出嚟嘅麵包售價自然水漲船高。好似呢幅新地王咁，「麵粉價」每呎超過二萬二，足足較五年前同區地皮價格升超出一倍。有業界人士計過數，將來新地王項目落成，即使標準單位實用價都盛惠三萬幾，豪宅更可能賣到四萬五。官老爺所謂「地價同樓價脫鈎」，三歲細路都呃唔到喇！
係人都知，近年內地積極提出「限購令」，加上人民幣貶值速度加快，吸引唔少內地發展商南下搶地，尋求資金出路，今次中標嘅發展商正正係其中之一。問題係，樓價炒到幾高都好，內地土豪水頭充足就話冇有怕啫，可憐本地用家望樓興嘆。北大人幾年前已經講過，香港房屋問題處理不當，會演化成政治問題，真係一啲都冇講錯。唔係咩，市民連安居樂業都成為奢望，點會唔怨氣沖天，社會又點會唔亂。特別係年輕人，為咗上樓無所不用其極，連「有樓有高潮」都噏得出，咪就係反映癲價樓市下扭曲嘅價值觀囉。
對於外來資金炒高香港樓市，港產官僚例牌又係三幅被，強調香港係開放型經濟，冇計劃限制外來資金投地，最重要係土地供應跟得上咁話。真係唔講猶自可，一講把幾火，如果土地供應真係充足，樓價真係市民負擔得起，豬欄雞棚改裝嘅劏房就唔會咁搶手喇！
家陣特首選戰冚冚聲，參選人爭住開政治期票，有人話房策以協助市民置業為主導，有人更加詩聖上身，大吟「安得廣廈千萬間，大庇天下寒士俱歡顏」。其實使乜搞咁多嘢吖，香港已經淪為內地富豪後花園，寒士咯喎，返鄉下搭茅屋就有份！