喺「狼來了」故事裏面，主角報流料報得多，最多都係慘遭狼吻，害咗自己性命，空管系統成日玩「狼來了」就唔同講法嘞，前線人員麻痹大意，分分鐘機毀人亡，絕對唔講得笑o架！
呢嗱，爛鬼空管系統又被傳媒踢爆出現甩漏嘞。據民航處員工爆料，新系統啟用首個月，就出現並唔存在又或者處於錯誤位置嘅「鬼機」，連同「航機或航機資料消失」、「雙重軌迹」等事故，夾埋超過八十次，其中三十次更因以為航機即將出現飛行間距不足，而導致衝突警告誤鳴，唔使問阿貴，民航處又係臭屎密冚，當冇事發生過。
咪以為警告誤鳴係小事吖，正如資深前線空管人員話齋，警報原意係提醒飛行人員作出應變，準確度好緊要，舊系統出現誤鳴嘅機率只有百分之一，反觀新系統三日唔埋兩日誤報，前線員工即時反應往往唔係應變，而係檢查係唔係誤鳴，長此落去分分鐘出事。
大家有眼見，新空管系統烏龍百出，三日一小鑊，五日一大鑊，民航官僚唔係亡羊補牢，反而一味死撐，企圖大事化小。之前被踢爆雷達顯示屏幕畫面消失十多秒，處方賴係信號質量受地勢、障礙物等影響，業界隨即反駁，指雷達信號質量向來穩定，狠批官僚愚弄誤導公眾。新空管系統問題愈揭愈多，到底仲有咩蝦碌嘢未曝光，真係冇人話得埋，乘客只能自求多福。
家陣乜都係假，最緊要係追瘦承辦商，盡快堵塞漏洞，防止意外發生。喂，幾千銀買部洗衣機都包保養喇，更何況大拿拿十幾億公帑，承辦商唔係諗住可以拍拍籮柚就算吖嘛。承辦商話就話提供咗解決方案，但情況一直冇改善，到底出咗咩問題，民航官僚一定要一查到底。
承辦商固然要追瘦，拍板購買爛鬼空管系統嘅前處長羅崇文一樣唔可以輕輕放過，當中係咪有人涉以權謀私利益輸送，廉記有必要了解吓。講起呢位仁兄，除咗入錯貨累街坊，任內大花筒劣迹斑斑，搞到怨聲載道，最後竟然獲港府放生．警告了事，千萬退休金袋袋平安，簡直離晒大譜。立法會政府帳目委員會將會就放生醜聞以及新空管系統問題，繼續咬住唔放，睇嚟羅崇文有排頭痕。
講到官僚入錯貨累到市民雞毛鴨血，新空管系統之外，唔可以唔提消防處第三代調派系統，呢個系統出錯多過食飯，連審計署都忍唔住狂炳。最好笑嘅係，消防處仲計劃將系統提升至第四代，稍後向立法會攞錢。喂，市民貼錢買難受仲要擔驚受怕，見過鬼都怕黑喇！