潮流興講集體回憶，曾經遍地開花嘅「走鬼檔」就係典型例子。夜麻麻肚仔餓，落樓拮串魚蛋，整番碗熱辣辣碗仔翅，不知幾過癮。只要睇吓早排農曆新年旺角熟食墟市大收旺場，就知真係有得搞喇！
唔係吹水o架。有團體最近調查發現，超過九成人支持香港開設多啲唔同類型嘅熟食墟市，同時贊成喺農曆新年以外加多啲日子搞呢類墟市。團體仲建議港府喺規劃方面作出配合，務求喺港九新界「梗有一間喺左近」添。
咁又係吖，香港地買嘢幾乎畀大型連鎖店壟斷晒，貨品千篇一律，遊客唔悶市民都悶。大家可以見到，愈來愈多人鍾情地區小店，就係貪嗰份親切感同人情味，絕對唔係大型商場同連鎖店可以媲美。再講吖，好多基層市民其實都想自力更生，問題係租魔肆虐，唔好話旺區舖租唔易捱，好多開喺領展商場嘅街坊文具店、快餐店都頂唔順。流動熟食檔就唔同嘞，推架木頭車出嚟就可以開張大吉，人都唔使請多個，成本低過美食車多多聲，所以話，搞熟食墟市，消費者多個選擇之餘，更多基層市民搵到餐晏仔，綜援等社會成本亦慳唔少，直頭係一家便宜三家着。
講起社會成本，舊年春節旺角暴亂，導火線就係小攤小販爭取生存空間，結果畀搞事分子利用。蒼蠅不叮無縫的蛋，如果唔係社會怨氣太大，如果港府順應民意，有心人想搞事都冇咁易喇。呢嗱，雞年春節官府延續以往慣例，「大赦」各區流動小販，結果咪天下太平囉！
可能有人會問，搞墟市地從何來？呢樣嘢可以放心，尚未發展嘅市區地皮仲有好多，與其丟空養蚊，不如撥一部分出嚟做墟市，咁就可以解決唔少問題。家陣特首選戰打到冚冚聲，功夫茶不妨醒條好橋畀一眾參選人，港府成日畀人批評偏袒權貴，邊個可以宣布收番晒啲位處官地嘅私人俱樂部同會所，肯定攞唔少民意分。
當然，好多嘢唔係話官老爺拍拍腦袋就可以成事。你知喇，墟市一定要開喺旺區至吸引到人流，噪音以至環境衞生等都會造成一定滋擾，好似有人建議喺北區興建墟市，攤販固然拍爛手掌，但區議會就有唔同意見，可見點樣做好規範，平衡攤販同居民利益，都幾考功夫。仲有吖，港產官僚出名懶過鬼，萬一把關不力搞到市民病從口入，到時盞弄巧成拙嘅咋。
總而言之，熟食墟市有得搞，就睇官老爺有冇決心同魄力嘅啫。搞得好，話唔定可以變第二條廟街，成為遊客慕名而至嘅生招牌o架！