阿里巴巴嘅馬雲講過，好多人失敗嘅原因唔係錢太少，而係錢太多，呢句說話送畀特區政府就最啱。唔係咩，港府金山銀山，富甲天下，卻一味做守財奴，對小市民錙銖必較，結果搞到民怨沸騰，直頭係失敗中嘅失敗喇。
呢嗱，港府嚟緊禮拜三公布新一份財政預算案，今個財政年度埋單計數，盈餘又係遠遠超出預期。會計師公會尋日就話，喺賣地收入理想嘅情況下，港府財政儲備相信好有機會突破九千億港元大關，創歷史新高。之前另一間會計師行嘅估計亦差唔多，今個財年港府將會錄得近八百億元財政盈餘，足足比原先預算高出四倍有多。前財爺鬍鬚曾年年估錯數，年年錯到離題萬丈，唔怪得被人鬧爆算術水平連小學生都不如。
講起呢位過氣財爺，真係唔知好嬲定好笑，明明自己去咗跑馬仔，人走茶涼(口架)喇，係都要對繼任人「波叔」陳茂波說三道四，話根據《基本法》，政府必須制訂平衡支出同收入嘅預算，希望其他財政司司長亦都遵從喎。真係唔講猶自可，一講把幾火，佢老哥任內就係因為開倉紓困不情不願，市民次次都要鬧到牙血都出埋，至肯推出一次性措施敷衍了事，最終落得「史上最廢財爺」嘅罵名，家陣仲好意思也文也武？
唔理點都好，波叔新官上任，大家對佢總會有啲期望。有政黨呼籲港府繼續推出公屋免租一個月等紓困措施；有政黨認為應該增加科研方面撥款，亦有人要求港府清埋張「長期欠單」，包括增加資助院舍供應等等，市民意見就畀咗嘞，波叔聽唔聽得入耳，仲要睇過至知，佢自己就話預算案會加大開支，應使則使，但唔會係放煙花式大開水喉，除咗一次性紓困措施，亦會增加長遠經常開支，講就講得好聽，實際係咪有料到，好快就見真章。
正如有人話齋，本屆政府進入倒數階段，波叔財爺個位屬於試工性質，份預算案搞得好好睇睇，博到市民掌聲，唔單止可以洗刷「劏房波」、「囤地波」污名，更加有機會順利過檔新政府。再講吖，今屆政府走數多過食飯，施政亂象叢生，市民早已經死心，嚟緊財政預算案係挽回少少分數嘅最後機會，開講有話，人爭一口氣，佛爭一炷香，今屆政府落雨收柴都唔想太過樣衰(口架)？
講到守財奴嘅下場，港產官僚應該睇吓明神宗嘅例子。呢位昏君除咗出名懶，仲出名孤寒，一味掛住刮錢，無論係賑災抑或平定民變，統統耍手擰頭，後來打開庫房一睇，先發覺啲金已經氧化發晒霉，之後無耐仲亡埋國，連史家都異口同聲話明朝「不亡於崇禎而亡於萬曆」。前車之覆，後車之鑑，港產官僚睇路吖！