「服務為本，精益求精。」香港警隊呢句口號嗌咗十幾年，係咪實至名歸唔敢講，但總算深入民心。可惜嘅係，隨住愈嚟愈多警隊高層退而不休，齊齊加盟商界搵真銀，警隊嘅形象亦大打折扣，被人質疑精益求精嘅唔係專業效率，而係搵銀門路；唔係為市民服務，而係為有錢人服務。
話口未完又嚟嘞，繼前警隊一哥曾偉雄未過兩年「冷河期」就申請擔任大財團兼職策劃顧問，一名前警隊二哥亦被傳未過冷河期就申請加盟地產商旗下公司，為期三個月，酬勞十分和味。內地官場有句順口溜，有權不用，逾期作廢，睇嚟香港官場仲犀利，權力永不過期，就算退咗落嚟，一樣大把人爭住請，錢繼續搵，利繼續送，退休原來係開展「錢」途嘅新起點。
話時話，警隊高層退而不休，走去幫有錢人打工，大家都見怪不怪咯，有人加入商界，有人幫賭場做嘢，有人同黑社會大佬拍檔搵食，最經典嘅係前特首曾蔭權爵士嘅細佬曾蔭培，啱啱卸任就急不及待加盟地產商集團，被質疑有延後利益有乜嘢出奇吖。
真係諗極都唔明，喺警隊做到首長級職位，在位時薪高糧準，退休時除咗可獲數以千萬計嘅一筆過退休金，仲可每月咬數萬元嘅長俸，無後顧之憂喇，咁都仲要幫商界打工，市民嘅觀感點會好吖。納稅人花咁多公帑奉養公僕，仲畀埋豐厚嘅退休金，就係保障佢哋可以生活無憂，享受人生，如果一個個卸任後仲咁打得做得，不如取消退休金，幫納稅人慳番筆好過。仲有喎，世上沒有無緣無故嘅恨，亦沒有無緣無故嘅愛，商界同退休警官一拍即合，冇可能唔被人質疑，警隊高層曾接觸大量敏感機密資料，加入財團之後會唔會因「利」乘便？警隊高層為退休鋪路，在位時有冇官商勾結延後利益？
咁講喇，警隊高層退休後繼續服務社會，唔係話唔得，既可以發揮所長又唔會惹人非議，其實有大把選擇，好似有人退休後做義工，幾正呀。家陣假難民為患，元朗、深水埗、尖沙咀等地淪為重災區，唔少村民驚到要組織更練團、自衞隊自保咁滯，如果警隊高層退休後去呢啲地方做義務保安，鎮守一方，儆惡鋤奸，市民必定拍爛手掌。
講到呢度，功夫茶諗起早前一名黑社會大佬出殯，到場監視嘅前線警員居然畀蠱惑仔大大聲問候老母，幾咁失威，如果有警隊退休高官坐鎮就唔同嘞，唔止可以挫黑社會氣燄，挽回警隊嘅面子，連地下世界都感恩添，絕對值得考慮o架。