麻雀雖小，五臟俱全。香港係彈丸之地，亦係石屎森林，但勝在風光秀麗，唔少行山徑令人流連忘返。好似麥理浩徑咁吖，唔止深受本港行山人士歡迎，而且揚名國際，獲外國傳媒評為全球二十大夢想郊遊徑之一，都咪話唔巴閉。
係咁嘅，國家地理頻道最近邀請二十位行山發燒友，包括越野跑手、集團總裁及作家等，嚴選全球二十條最佳行山徑「夢想之路」，結果香港麥理浩徑榜上有名，同瑞士、加拿大、新西蘭、美國等地嘅行山徑齊名。一位推薦麥理浩徑嘅外國作家對呢條行山徑讚不絕口，佢曾經花一星期時間行完全程，優美嘅大自然風光令佢畢生難忘，覺得冇其他地方比得上。
唔係誇張o架，麥理浩徑全長一百公里，共分十段，沿途穿越八個郊野公園及大帽山，係全港最長及最有特色嘅行山徑，每逢假日都吸引唔少行山發燒友挑戰腳力。正如國家地理頻道話齋，香港作為全球人口最密集嘅地方之一，竟然有一條咁難得嘅行山徑，好值得世界各地行山人士到此一遊。
咁又係吖，香港行山徑聞名遐邇，一直有唔少日本、南韓及台灣等地旅客專程來港行山，佢哋覺得香港四面環海，既有山景，又有海景，加上交通方便，配套完善，其他地方難以相提並論。近年亦有唔少內地旅客識貨，除咗來港購物，仲會一家大細享受行山樂。
正所謂，牆內開花牆外香，香港行山徑獲國際機構推薦已經唔係第一次，外國權威旅遊指南曾經推介六大香港必到郊野景點，包括龍脊、南丫島、大澳等等；美國電視台亦曾推介本港五大行山路線，包括眺望港島西海景嘅薄扶林水塘道至山頂、林蔭夾道嘅陽明山莊至赤柱、睇姻緣石嘅布力徑至寶雲道等。呢啲行山徑風景美麗，一直得唔到港府重視，反而經常獲外國人推介，都咪話唔諷刺。
話時話，現代都市人生活緊張，難得有機會放鬆心情，親近大自然，確實係一件賞心樂事，唔怪得愈來愈多人鍾意行山。本來呢，香港有咁多郊野公園同行山徑，只要稍為包裝及推廣，絕對可以成為吸引旅客嘅新景點，可惜港產官僚有眼無珠，沉香當爛柴。當年沙士之後，港府大力提倡離島遊，旅行社亦紛紛開辦一天團，點知只有三分鐘熱度，好快就偃旗息鼓，不了了之。
冇法子喇，港府做嘢不嬲都係雷大雨小，虎頭蛇尾，話就話要發展旅遊，其實得個噏字，珍貴旅遊資源擺喺面前都唔識利用，反而浪費金錢周圍推廣，你話係咪本末倒置吖？講到尾，旅遊業無以為繼，皆因港府渾渾噩噩，捉到鹿唔識脫角！