怪事處處有，香港特別多。呢頭城大冧完天台，嗰頭超過一百五十年歷史嘅舊中區警署一幅外牆就轟然倒下，接住仲有乜嘢會冧呢？會唔會有更驚人嘅事故發生？有人話香港近年諸事不順好似撞咗邪咁，真係唔到你唔信！
講起舊中區警署，來頭絕對唔嘢小，前身係中央裁判司署，與毗鄰嘅域多利監獄組成中區警署建築群，目前正進行活化工程，預計年底向公眾開放，經過今次意外，工程無限期押後。咁就大吉利是嘞，近年警隊醜聞多多，佔中之亂時被指姑息養奸，家陣假難民為非作歹，元朗淪為罪惡城，警方更被質疑警賊一家親，大傷元氣，本來諗住舊警署活化可以重振雄風，點不知舊警署竟然冧埋，咁咪即係話警方雄風不起，啪番幾粒偉哥都未必掂？
嗱，風水佬呃你十年八年，但一個地方冧邊瓣衰邊瓣，珍珠都冇咁真。一○年禮賓府正門前冧樹，自此前特首曾蔭權爵士醜聞纏身，雞毛鴨血。最近城大綠化天台倒塌有咩啟示，唔使功夫茶多講。原本清淨嘅大學校園早就變得政治化，部分教師不務正業，公然鼓吹違法達義；不少學生無心向學，一味醉心街頭鬥爭，呢啲就係所謂嘅未來社會「棟樑」，香港唔冧至奇喇。
點解香港冧完一樣又一樣？聽吓堪輿學家點講。佢哋話喎，今年係「二黑」飛星入中宮，代表土星受困，容易發生山泥傾瀉、冧樓等與土地相關嘅問題，加上今年係農曆寅申巳亥猴年，除咗土地之外，交通、航空、大型網絡等都可能出問題。玄學家之言，信不信由你，不過冧樓嘅預言已經應驗咗，萬一再發生其他大鑊嘢，分分鐘死得人多㗎。
其實古人早就有天人感應之說，認為不祥之兆往往係上天嘅警告。如果話禮賓府冧樹代表特首冇運行，大學冧天台代表學風淪喪，警署倒塌代表港府權威蕩然，咁作為香港精神象徵嘅獅子山都被人騷擾，濕滯嘢肯定陸續有來。話時話，名曲《獅子山下》代表港人團結自強嘅精神，連國家領導人都讚不絕口，可惜有人唯恐天下不亂，三日唔埋兩日就喺「獅頭」搞搞震，睇見都眼冤。相傳古代九條惡龍為禍香江，上天於是派一隻獅子下凡除害，形成今日嘅獅子山，亂搞獅頭得罪神明，太歲頭上動土，盞唔衰攞嚟衰嘅咋！
香港福地變亂地，講到底都係自作自受。所謂衰開有條路，天台冧咗，警署冧咗，四大經濟支柱同樣搖搖欲墜，嚟緊股市會唔會冧，金融中心會唔會冧，港府會唔會冧，甚至「一國兩制」會唔會冧，真係冇人話得埋。