天有不測之風雲，天氣變化從來唔易捉摸，不過當局嘅雷雨警報及應對失當就相當「穩定」，次次都添煩添亂，次次都害人害物，唔到你唔服。
嗱，又嚟料嘞。本港尋朝天氣惡劣，天文台喺短短六個小時內兩度發出紅色暴雨警告信號，其中今年首個紅雨警告喺繁忙時間七時三十五分懸掛，教育局拖延十分鐘至公布學校停課，搞到不少市民「裙拉褲濕」狼狽不堪，有學生返到校門至知停課要折返，有家長因為要送子女回家而耽誤返工，有學校甚至因為大部分學生已回校而索性違規上課。一場紅雨，民怨載道，網絡洗版炮轟當局訊息混亂，通報機制形同虛設，更有網民批評天文台同教育局不食人間煙火，罔顧學生安全及利益。
市民咁火滾唔係冇道理架，正如教育界人士踢爆，教育局同天文台有協調機制，一般來講如果預計有紅雨或颱風，教育局會喺清晨六時左右宣布停課，方便家長同學校預先安排，而今次過咗七時至宣布停課，情況相當罕見。
最離譜嘅係，明明天文台已經公布紅雨警報，教育局居然十分鐘後至宣布停課，唔通官僚全部瞌緊眼瞓？正所謂，差之毫厘，謬之千里，何況相差十分鐘添，幾多家長學生因為咁而中招吖。如果有學生喺上學途中出事，邊個負責先？教育官僚話今次宣布停課時間「有啲尷尬」喎，其實，當局間接害慘市民，何止尷尬咁簡單。
好明顯，天文台同教育局各自為政，欠缺溝通，根本無將學生福祉放喺眼中。根據現行法例，當紅雨警報生效，所有上午校及全日制學生都毋須上課，既然係咁，點解當局唔索性喺公布紅雨警報時宣布停課安排呢？點解咁小嘅事都唔肯為學生行多一步呢？一滴水看穿世界，一場紅雨更加睇到港府冇心冇肺冇靈魂，胡混度日，市民點會唔怨氣沖天吖。講真，尋日全港多區大雨滂沱，交通阻塞，如果當局急市民所急，早啲掛紅雨警報，家長同學生就唔使咁狼狽喇。
話時話，當局應對突發天氣手足無措，早就唔係新聞咯。今年初本港氣溫創半世紀新低，大嶼山滴水成冰，天文台後知後覺比外國氣象機構慢幾拍，固然係國際笑話，以往多次預測颱風失準，搞到市民上班上學大失預算，更加係典型混帳。港府大事做不來，小事做唔好，連雷雨警報都雞手鴨腳，你話係咪廢柴吖。
冇符喇，呢個政府實在廢吖嘛，邊係做嘢吖。既然天文台、教育局次次應對失措，次次靠害市民，仲有乜嘢存在價值吖，不如摺埋好過！