開講有話，殺人填命，欠債還錢，呢啲係天經地義嘅事。同樣道理，邊個搞亂香港，邊個破壞法治，邊個就要承擔責任，咁至係天公地道吖，冇理由你請客我埋單，你破壞我受罰，係咪咁講先？
係咁嘅，身兼中央港澳工作協調小組組長嘅全國人大委員長張德江視察香港期間，睇咗、聽咗仲講咗好多語重心長嘅說話，尤其係提到大家坐埋同一條船，「香港好，大家好，香港亂，大家一起埋單」呢句，引起議論紛紛。冤有頭，債有主，絕大部分市民都想香港好，更加冇份搞亂香港，要無辜嘅人一齊埋單好冤枉啫，到底埋單嘅係邊個，講清楚啲至啱吖嘛。
話時話，張德江雖然冇講明應該由邊啲人埋單，不過佢特別強調法律面前人人平等，冇任何人可以凌駕法律之上，敦促港府嚴明執法，公正司法。嗱，畫公仔唔使畫出腸，張德江呢番言論唔係無的放矢，香港今日烏煙瘴氣，七國咁亂，源頭正正係前年佔領之亂，邊個搞亂香港，邊個要為香港衰落孭鑊，呼之欲出喇。
大家有眼見，佔領之亂破壞法治，撕裂社會，打擊經濟，搞到香港幾乎萬劫不復咁滯，之後嘅鳩嗚光復鬧劇同埋旺角暴亂，鑊鑊新鮮鑊鑊甘，卒之本土思潮氾濫，港獨甚囂塵上，根本就係佔領嘅延續。要埋單嘅唔係呢班牛鬼蛇神，仲有邊個喎？
當然喇，香港淪落到今日嘅田地，佔領搞手同幕後黑手固然係罪魁禍首，港府姑息養奸一樣難辭其咎。呢，佔領落幕後主要搞手本已一網打盡，殊不知港府好快就放虎歸山，搞到呢班亂臣賊子至今逍遙法外。港府點止老虎屁股唔敢摸，連小小老鼠都放走埋，唔係輕判就係無罪釋放，有冇再離譜啲吖。你話嘞，全世界有邊個法治社會，犯法嘅人唔使負上刑責，仲可以成為英雄吖？除咗香港，根本冇第二個地方係咁荒謬，自毀法治長城咯喎，社會有乜法子唔亂上加亂。
即係咁，北大人已經出到聲，勒令港府有法必執，除惡務盡，之但係港府做唔做得到仲係好大嘅疑問，你知喇，港府不嬲無心無肺，無膽無能，旨意呢班廢官嚴明執法，公正司法，睇怕都係所託非人咯。學者及立法會議員就講得啱嘞，港府有法不依，執法不嚴，年輕人以為犯法毋須成本，個個有樣學樣，再咁落去，暴動都似。
計功夫茶話齋，香港呢條船風雨飄搖，危機四伏，船長無神經，大副、二副無靈魂，惟有自己香港自己救，市民要拒絕陪葬，必須團結一致，力挽狂瀾，如果唔係，呢條船遲早沒頂嘅咋。