「老吾老以及人之老」，呢句說話係人都識講，但究竟有幾多人做得到，真係令人懷疑。尤其係最近發生嘅私人院舍虐老事件，除咗暴露安老服務問題多多，亦再次證明港府監管不力。
當局可能知衰啩，尋日突然宣布押後推出簡稱院舍券嘅長者院舍住宿照顧服務券。勞福局局長張建宗以審時度勢形容，承認虐老事件係全面審視私人院舍服務嘅契機，希望港大團隊可以透徹研究問題喎。嗱，咁咪即係認衰囉。
院舍券計劃係咁嘅，港府預留咗八億元，原定九月起向輪候緊資助院舍嘅長者派發服務券，畀佢哋自行挑選合心水嘅私人院舍。當局聲稱呢招係「錢跟人走」，可以促使院舍自行提升服務質素喎。點知人算不如天算，大埔私人院舍爆發長者被剝光豬等沖涼嘅醜聞，引起社會嘩然，黑心院舍固然成為眾矢之的，港府縱容虐老亦受到千夫所指，喺風頭火勢之下，當局為免火上添油，焗住要押後院舍券計劃。
即係咁，為咗解決資助宿位嚴重不足嘅問題，港府推出院舍券本來係無可厚非嘅，起碼可以畀老人家多個選擇。弊在社署監管不力，業界質素參差不齊，老人家根本唔知點樣選擇，盲目將佢哋推向私人院舍，等於推落火坑，即係靠害啫。所以話，推行院舍券唔係唔好，但首先要加強監管，提升院舍質素，否則，浪費公帑事小，助紂為虐事大吖。
話時話，私人院舍之所以問題多多，醜聞百出，就係因為社署敷衍塞責，冇做好自己份工。就以呢間虐老嘅院舍嚟講，過去五年被投訴十二次，社署共發出十五封警告信，但從未採取進一步行動，直到今次醜聞曝光後，先至決定不予續牌。你話嘞，社署官僚得過且過，私人院舍有恃無恐，有乜法子唔七國咁亂吖。
講嚟講去，要解決安老問題，關鍵係港府必須有所承擔。由於資助宿位長期短缺，每年都有幾千名長者喺輪候期間含恨而終，而港府就一味推卸責任，一時叫人居家安老，一時叫人北上安老，一時又以院舍券敷衍長者，結果愈搞愈亂。正如古人話齋，為長者折枝，非不能也，實不為也。港府窮到只剩下錢，增加安老宿位只係舉手之勞啫，連咁簡單嘅事都唔肯做，仲學人講「老有所養、老有所依」，你話係咪笑話吖。
當然喇，安老人人有責，有啲人為反對而反對，連興建安老院嘅計劃亦百般阻撓，簡直匪夷所思。咪話功夫茶唔提醒，社會日趨老化，安老問題迫在眉睫，港府再唔諗辦法解決，後果好嚴重o架！