香港好似中咗邪咁，基建工程無一不延誤，無一不超支，而且愈來愈惡化，簡直成為無藥可救嘅絕症。尤其係五條新鐵路線，更係烏龍百出，連審計署都忍無可忍，表明有權介入調查。
嗱，審計署係咁講嘅，一直關注各條鐵路新線嘅工程出現延誤及超支問題，但該署只能調查經由立法會通過撥款嘅鐵路項目，唔係所有項目都可介入。即係咁，五條新鐵路分別係高鐵香港段、沙中線、西港島線、南港島線及觀塘延線，前三條路線係由政府直接動用公帑或以補助方式興建。換句話講，審計署有權調查嘅項目包括高鐵、沙中線及西港島線。
話時話，港鐵工程醜聞不斷，涉及龐大公帑，審計署早就應該調查喇。正如立法會議員話齋，港府亂花公帑，鐵路工程全部變成超支無底洞，審計署一來應調查路政署等監管部門係咪失職，二來應為鐵路工程止血。特別係高鐵工程嚴重延誤，係咪有人合謀隱瞞，更加要查個水落石出。
冇錯嘞，莫講話五條鐵路線，淨係高鐵延誤及超支都有排查喇。呢條短短二十六公里嘅鐵路，可以講係多災多難，唔止一延再延，而且一漲再漲，由○一年立法會通過撥款時估價六百五十億元，到早前估計八百五十億元，再到最新估計九百億元，建造成本節節上升，沒有最高，只有更高，最後埋單計數唔知仲要超支幾多添。仲有吖，由於工程嚴重延誤，二○一七年通車嘅目標注定無法實現，究竟幾時至可以完工，睇怕連港府都矇查查。
最離譜係，高鐵本來講好係一地兩檢，點知拖到依家仲未拍板，搞到相關工程嘅招標工作被迫擱置。如果使成千億元興建嘅高鐵只能採取兩地兩檢，仲慢過現時嘅直通車，咁就真係嘥氣喇。
唔講唔知，港鐵負責興建五條新路線，其中三條成為全球最貴嘅鐵路。西港島線排第一，短短三公里造價一百八十五億元，平均每公里成本超過六十一億元，足足比九四年建成嘅英法鐵路每公里成本十六點五億元貴兩倍半；沙中線亦唔平得幾多，十七公里造價七百九十八億元，平均每公里成本接近四十七億元；高鐵平均每公里成本家陣亦超過三十四億元，最後可能仲唔止，問你怕未。
所以話，善財難捨，冤枉甘心。港產官僚係名副其實嘅敗家仔，呢度超支幾百億，嗰度浪費幾十億，咁搞法，就算擁有金山銀山，都遲早畀佢哋敗晒喇。嗱，審計署再唔盡快介入調查，庫房只會流血不止嘅咋。