廣東話有句歇後語︰二仔底——死跟。本港食安問題層出不窮，官僚後知後覺，次次都係外地爆大鑊至急急跟進，呢句話形容佢哋最貼切不過嘞。
台灣每次爆發食安醜聞，香港都唔能夠獨善其身，近日台灣又掀起毒茶風暴，多款知名品牌被驗出農藥超標，香港又點可以例外吖。尋日之嘛，一間台灣知名咖啡店出售嘅茉莉花草茶被驗出含過量殺蟲劑，佢哋喺香港設立嘅分店亦牽涉其中，食環署官僚話非常關注事件，已同台灣方面聯絡，如有進口相關批次茶葉，會即時公布喎。咁即係點？即係不打自招，證明官老爺對毒茶事件一無所知，坐等對方通知囉。
呢幾日台灣接連發現有毒茶葉，搞到人心惶惶，港府竟然仲係矇查查，簡直令人難以置信。事實上，到底有冇相關茶葉入口香港，有冇人中招，官老爺都係一問三不知。反應慢都算嘞，知道涉事公司喺香港有分號，居然唔係第一時間將相關產品下架，而係由涉事店舖主動去做，真係畀佢吹脹！所以話啫，旨意官老爺為市民把好食品安全關，就好似有市民諷刺靠反對派推動民主咁，直頭瓜得喇。
話時話，本港食品檢測甩漏多多，形同虛設，兩岸食安風暴連環爆，幾乎冇一次係港府首先發現嘅。除咗今次毒茶事件，之前嘅坑渠油、塑化劑風波，通通係台灣率先踢爆，港府賊過興兵。最搞笑係，台灣坑渠油事件爆發，港府滋油淡定，等住睇人哋笑話，點不知坑渠油嘅源頭之一竟然係香港，簡直醜死怪。內地食安問題更加不在話下，遠嘅唔講，就講舊年麥當勞被揭發用過期肉，本港食安中心失察在前，隱瞞在後，甚至一度幫企業講好說話，搞到公信力一鋪清袋。即使一海之隔嘅澳門，檢測水平都贏香港幾條街。早前本港加工嘅煙三文魚柳被李斯特菌污染，港府都係根據澳門當局提供嘅線報做嘢，你話死唔死吖。
難為港府仲開口埋口發展檢測認證業，連食品檢測咁簡單嘅嘢都搞唔掂，一味掹人衫尾死跟，睇嚟都係慳番啖氣暖肚好過咯。唔怪得有人建議，食安中心與其留喺度獻世，不如索性摺埋，直接外判畀台灣或者澳門好過。家陣驗又驗唔出問題食品，又唔學吓人哋治亂世，用重典，食安問題有乜法子唔長爆長有吖。
嗱，港產官僚如果真係想保住飯碗，辦法唔係冇，等功夫茶免費醒條好橋畀你哋喇。不妨學舊時太監咁，喺皇帝進膳前先試吓食物有冇毒，試過冇事先入口，咁或者仲有少少存在價值嘅。