司機違反交通條例隨時要釘牌，食肆唔符合衞生條例亦要釘牌，連電視台廣播服務唔達標都要釘牌，偏偏私營安老院舍虐老醜聞不絕，到依家先至被釘牌，簡直匪夷所思。
功夫茶講緊嘅咪就係被踢爆要長者剝光豬等沖涼嘅大埔私營安老院舍囉。社署尋日通知院方，拒絕續牌申請，如無意外，最遲今個月底就要關門大吉，成為第二間被吊銷牌照嘅院舍。
講真，涉事院舍嘅虐老案底仲厚過電話簿，社署拖到依家至做嘢，簡直係後知後覺。有前院友大爆黑幕，話一名職員要輪流替四十名長者沖涼，喺公眾地方剝光衣服輪候係家常便飯。查實社署過去五年已接獲九宗針對涉事院舍嘅投訴，並發出十二封警告信，早就知道問題所在，但就一直闊佬懶理，今次如果唔係全城鬧爆，迫於強大民意壓力，社署可能仲係懶懶閒咋。
當然喇，遲到好過冇到，社署出手無疑慢咗幾拍，但總算係亡羊補牢，依家最大嘅問題係，點樣安置受影響嘅五十多位院友？社署大派定心丸，話已經成立支援小組協助院友同家屬另覓宿位，又強調大埔區仲有二百個空置宿位，受影響長者可以原區安置喎。
嗱，講就係咁講嘞，實際又係點嘅呢？係人都知，由於政府縮骨，資助宿位嚴重供不應求，導致每年有幾千名長者等到死都未輪到，但同一時間就有大量私營安老院宿位無人吼。之所以咁，除咗因為私營院舍收費高昂，基層長者未必負擔得起，更重要係私營安老院質素參差不齊，長者食唔好，着唔暖，甚至被職員毆打嘅醜聞無日無之。家陣話就話有空置宿位，但服務質素係點，家屬一無所知，只能望天打卦。
講到底，私營安老院舍之所以問題多多，亂象叢生，社署執法不嚴，絕對難辭其咎。正如有人話齋，社署即使查到院舍違規，好多時都係警告了事，事關資助宿位嚴重不足，萬一院舍被釘牌，社署就要搵地方安置長者，所以咪關人個關，一味推卸責任囉。除咗資助宿位僧多粥少，護理人手不足亦係大問題。長者護理話晒係厭惡性工作，請人唔係咁易，好多院舍十個煲得七個蓋，職員做到踢晒腳，就算唔虐老，態度都唔慌好得去邊，引入外勞本來不失為一條出路，弊在政客阻頭阻勢，諗都咪使旨意諗。所以話，呢啲深層次問題一日唔解決，虐老醜聞只會陸續有來嘅咋！
難為港府開口埋口「老有所養，老有所依」，連安老院舍亂象都搞唔掂，講乜都嘥氣啦！