港產官僚冇嘢叻，最叻就係卸膊，成日以用者自付、寓禁於徵為理由，乜都向錢看，環保係咁，解決交通問題亦係咁，搞到爭議四起，怨聲載道。
呢，港府接納交通諮詢委員會嘅所謂建議，正磨刀霍霍準備向駕駛者動手，包括增加私家車首次登記稅、牌照費、柴油車燃料徵費、咪錶泊車位收費及俗稱「牛肉乾」嘅定額罰款，其中牌費可能勁加八成添，問你怕未。
當局嘅理由係，塞車問題日趨惡化，二○一三年市區平均行車速度只有每小時約二十三公里，部分主要道路早上繁忙時間行車時速更低至十公里，僅比成年人步行時速四至五公里略快。當局認為近年車輛數目大增係塞車元兇，所以要寓禁於徵喎。
即係咁，塞車問題日趨惡化係事實，車輛數目不斷增加亦係事實，但如果當局認為向駕駛者開刀就可以解決問題，咁就太傻太天真喇。正如有人話齋，就算調高各項收費，亦只能短暫影響市民買車或駕車意欲，要長遠解決塞車問題，應增加停車場及道路等設施。
冇錯嘞，錢可以解決嘅問題根本唔係問題，港府以前唔係未試過加價，結果車輛咪一樣繼續增加，交通咪一樣繼續擠塞。講到底，隨着人口增加，車輛多咗都好正常啫，全世界都係咁嘅喇，改善道路設施，完善公共交通網絡，先至係治本之道。可惜吖，當局話就話會多管齊下，其實來來去去只係收錢一招，而且次次都係向私家車開刀，想唔令人反感都幾難。有人話，收錢係最簡單嘅辦法，亦係最懶惰嘅辦法，真係一啲都冇講錯。
毫無疑問，香港公共交通網絡的確比好多城市發達，但咁唔表示私家車冇存在價值。係人都知，市區樓價及租金愈來愈高，負擔唔起嘅市民焗住搬去偏遠地區居住，返工返學， 一來一回，乘搭公共交通工具左等右等，左駁右駁，唔止費時失事，而且收費唔平，喺咁嘅情況下，有人以私家車代步係正常嘅事，點解要趕盡殺絕呢？唔通只准有錢人擁有私家車，唔准普通市民代步？
再講喇，就算寓禁於徵行得通，徵幾多亦係一個大問題，徵得少盞嘥氣，徵得多惹民怨，隨時得不償失，弄巧反拙咋。今日香港爭議多多，矛盾尖銳，港府本來已經動輒得咎，仲要帶頭掀起加風，過到立法會呢關至奇吖。
正所謂，人有自知之明。港府自顧不暇，無謂再添煩添亂，與其絞盡腦汁向駕駛者開刀，不如諗吓點樣改善道路設施好過喇。