林志堅歎盡香港情懷
德甲港將林志堅上周五晚趁球季歇暑返港，佢已經有十四年未返過嚟，上次尋根時只得九歲，今次當然要盡情細味香港情懷！佢話位於上水馬草壟嘅村屋祖家完全冇改變，一如過去予人懶洋洋嘅閒適，十分寫意，不過出到市區就轉變巨大，彷如置新一個陌生都市，充滿新鮮感。至於佢最享受嘅，依然係醉人嘅香港夜景。
志堅今次同爸爸林金發、兩位家姐同兩位姐夫一齊返港，抵埗翌日已經全家拉隊暢游旺角同尖沙咀，喺西洋菜街睇街頭表演開心到好似一個小粉絲，跟住睇幻彩匯演同夜景，就更加陶醉不已。去完市區，緊接兩日仲隨同家人登山祭祖，林爸爸話志堅自細好錫阿爺阿嫲，每次返嚟都會盡快去探佢哋，如今佢哋已經仙遊，今次當然全家出動，為先人掃墓，志堅落手落腳最勤力。佢哋之後仲暢遊過兒時最愛去嘅馬騮山，重拾昔日童真。
揸筷子歎點心不過唔飲茶
不過，志堅最開心就喺一家人喺屋企食飯，爸爸自細已經教曉佢哋用「Essstbchen」（德文，即筷子），佢話同兩個家姐，兩個姐夫雖然都喺德國出世，但個個識用筷子，記者同佢一家人一齊歎中國茶，佢一見到蝦餃燒賣就高興到不得了，食個不亦樂乎，不過志堅唔習慣飲茶，選擇一路歎點心一路飲汽水。
志堅話今次回港係全面休息，盡情吃喝玩樂，雖然香港高濕度令佢有啲攰，但整體天氣都ok。尋日佢哋舉家去澳門旅遊，入賭場觀光，今日上深圳歡度24歲生辰。星期日佢會留低家人，一個人飛番歐洲，返到去佢至恢復每日跑步，為下月復操做準備工夫。
對於新球季，基於季尾已經重新得到格雷特霍夫教練布斯根斯重用，佢話最大心願係遠離傷患，只要健健康康，佢對自己足球事業前途充滿信心。
圖/文：張恩爗、黃兆崑