一般嚟講，郵件被打回頭只有兩種可能，一係郵資不足，二係地址寫錯。不過咁，世事冇絕對，香港郵政烏龍百出，就算你嘅郵件貼足郵資，地址正確，都隨時會被打回頭嘅咋。
唔係講笑o架，香港郵政又再「失信於民」喇。呢次同樣充滿戲劇性，一百封應該派去大埔一間中學、一間小學以及社區中心嘅郵件，居然遊遍九龍新界，先由九龍灣中央郵件中心分派到大埔派遞局，之後又被大埔派遞局「遣返」九龍灣郵件中心，直到中心職員發現，先至再次送往大埔，卒之成批郵件延誤咗一日，既浪費時間，更浪費公帑，萬一遊遊吓失蹤仲大鑊。香港郵政承認人為疏忽並「致歉」，話會提醒員工以後小心處理喎。
咪以為呢啲係小事吖，小事頻頻發生，就會變成大事嘅喇。正如有區議員話齋，郵件延誤派遞後果可大可小，唔係一句人為疏忽就可以卸責。有立法會議員更直指事件「離晒譜」，指香港郵政屢次出錯，服務質素下降。
正所謂，衰開有條路，香港郵政失信於民成為家常便飯，今次事件可能只係冰山一角，唔知仲有幾多醜聞被冚住。就呢個月初之嘛，有郵差喺屯門派遞期間懷疑遺失郵袋，搞到要報警求助，結果警方喺郵車上搵番批郵件，你話係咪有人專登玩嘢吖？唔講唔知，香港郵政曾發生八日內三次失竊郵袋嘅醜聞，都咪話唔離譜。
冇計喇，香港郵政出咗名管理混亂，不務正業，大家早就見怪不怪咯。審計署幾年前已批評香港郵政經營不善，連連虧損，促請盡快諗辦法止血，可惜對牛彈琴，近年來郵政經營狀況冇改善不特止，反而不斷惡化，搞到要諗縮數，早排一口氣縮短轄下近六十間郵局嘅辦公時間，引起市民怨聲載道。有區議員要求恢復原來辦公時間，郵政署長丁葉燕薇仲死撐話縮短郵局辦公時間，係考慮到服務需求及善用資源喎，簡直九唔搭八。
講開又講，香港郵政曾花費數百萬元聘請顧問公司進行所謂「改革研究」，點知因為內容「唔啱聽」而賴帳，被顧問公司怒斥無法無天，簡直唔衰攞嚟衰。其實，郵政改革只不過係做騷，純粹為咗敷衍市民，最匪夷所思係香港郵政居然充當政治打手，涉嫌違法滋擾東方報業集團，事後嘅調查又敷衍了事，未有解答種種疑團，連道歉都冇句，企圖蒙混過關，不了了之。
都係古人講得啱，物必先腐而後蟲生。香港郵政醜聞多多，證明內部腐爛，港府再唔出手整治，遲早累人累物嘅咋！