醜聞多多照升職 民航官僚真無恥

各位大懶蛇注意,如果閣下渾渾噩噩,最叻孭鑊,但又想平步青雲,高職厚祿,入港府做官就係不二之選嘞。特別係民航處,官僚就算幾咁窩囊,幾咁失職,幾咁多醜聞纏身,能力幾咁受質疑,一樣升官加祿,位居要職,試問天下間仲有邊份工可以咁筍咁荒謬吖!

嗱,東方報業集團連環踢爆民航處嘅新空管系統「睇得唔用得」、新總部大樓淪為「豪華娛樂城」,觸發審計署及立法會政府帳目委員會介入調查及炮轟。本來外界以為有關官員需要問責,就算唔使炒魷魚,都要燉冬菇喇,可惜事實啱啱相反,帳委會對新空管系統嘅聆訊尚未完成,其中兩名醜聞主角居然雙雙升官,原助理處長李天柱擢升為署理副處長,原總工程師胡志光更毋須署任就直升助理處長,即係失職官僚唔止無受懲罰,反而獲得獎賞,呢啲咪就係內地常見嘅「帶病」升官囉。

即係咁,民航處淪為獨立王國,官官相衞絕對唔出奇,不過都唔好當市民盲嘅吖。李天柱有份負責新空管系統嘅裝設及測試工作,曾經拍心口承諾新系統可以喺一四年啟用,結果證明吹水唔抹嘴,而有份參與擬訂標書嘅胡志光,更加係導致民航處買錯廢柴系統嘅元兇之一添,佢哋無被革職查辦都偷笑喇,居然仲獲升職加薪,叫市民如何信服?退一步講,就算民航處要自把自為益自己友,都唔好咁過分吖。正如有立法會議員批評,當局喺聆訊期間擢升兩名涉事官員,根本不尊重帳委會!

無計喇,臭罌出臭草,成個民航處烏煙瘴氣,呢單升官醜聞只係冰山一角咋。嗱,呢個大花筒部門又嚟料嘞,話因為新空管系統延誤開通,需要額外年花二千萬元保養舊系統喎。仲有吖,佢哋回覆帳委會查詢時自爆懷疑超買空管工作席位,總數達到一百二十個,足足係實際所需人數嘅三倍。民航處管理混亂,洗腳唔抹腳,簡直好似一個無底深潭,納稅人真係冤哉枉也。

都係古人講得好,上樑不正下樑歪,民航處處長羅崇文本身就係一個醜聞專家,下面嘅人都係蛇鼠一窩o架喇。唔係咩?民航處爆出連串大花筒及管理不善醜聞,羅崇文淪為眾矢之的,被帳委會以最嚴厲嘅「痛斥」字眼狠批,指佢「故意疏忽職守」,蓄意隱瞞醜行,而佢居然拒絕落台,簡直厚顏無恥。既然民航處一哥都戀棧權位咯,下屬好官我自為之,都係有樣學樣啫。

呀,差啲唔記得,羅崇文最遲明年九月退休,除咗一筆過一千二百萬元退休金,每月仲有七萬幾蚊長俸袋袋平安。見微知著,港府庸官當道,香港想唔墮落都難。