世界上最遠嘅距離係乜？唔係印度詩人泰戈爾所講，「我站在你的面前，你卻不知道我愛你」，而係港府嘅熱線電話，「我站在你的面前，你卻不知道我的需要」。熱線電話打極唔通，市民求助無門，你話距離遠唔遠吖。
係咁嘅，港府設立多條健康熱線供市民查詢，出發點本來係好嘅，可惜當局敷衍了事，求求其其，搞到熱線變冷線。本報記者測試過，部分電話長期打唔通，好似醫管局嘅思覺失調熱線咁，辦公時間內打咗近廿次，都出現語言系統失靈嘅情況，而醫管局網頁竟然冇任何有關熱線服務時間嘅資料，甚至連網上評估系統都失靈埋。你話嘞，提供服務者本身尚且「思覺失調」，熱線又點可能正常運作呢！
最無厘頭係衞生署嘅家庭健康服務資訊熱線，話明提供廿四小時服務，可以即時查詢嬰兒及孕婦健康問題，但記者打通之後，竟被老點輸入內線號碼，結果等極都冇人聽。醫管局廿四小時精神科熱線亦唔好得去邊，記者打咗十次先至有人回應，點知對方除咗叫記者睇專科並提醒至少要輪候一年，乜嘢實際建議都冇，問你服未。
設立熱線本來係為咗方便市民，解決問題，家陣變成製造問題，添煩添亂，市民得唔到所需服務，反而更加谷氣添。呢，唔少長者就係因為預約診症熱線左駁右駁，左等右等，不勝其煩之下，索性放棄求診。正如病人權益組織話齋，當局設立熱線，表面上做咗嘢，但冇真正幫到人，根本係浪費公帑。有立法會議員要求有關部門除咗定時檢討同改善服務，亦應該調查使用頻率，確保熱線發揮作用。
話時話，熱線電話形同虛設，已經唔係一朝一夕嘅事咯。好似1823政府熱線咁，當局成日宣傳可以為市民提供一站式查詢及處理投訴服務，可惜次次打通都係先帶你遊花園，然後叫你留低口訊，之後就冇晒下文。以前打去政府部門詢問都有人答覆喇，依家打去熱線淨係聽到錄音，兜兜轉轉，費時失事，簡直係阿茂整餅，冇嗰樣整嗰樣，唔怪得有人話香港樣樣嘢都退步喇。
港府大事就話做唔到啫，連熱線電話咁簡單嘅事都搞到怨聲載道，想唔認無能都唔得喇。計功夫茶話齋，乜嘢熱線都好，最緊要從方便市民嘅角度着想，如果港產官僚唔係急市民所急，一味閉門造車，熱線電話只會變成聾耳陳隻耳，得個睇字，幫唔到市民不特止，反而做咗官僚卸膊嘅擋箭牌。