青年揚威國際賽 創業好過搞政治

有人話香港青少年係失落嘅一代,呢種講法唔係完全冇道理,睇吓部分青少年愈來愈偏激,就知道佢哋幾咁失落。不過咁,世事無絕對,唔係所有青少年都失落o架。

呢,青年創業家林苑莉憑嶄新及輕鬆嘅教學方法創業,日前喺杜拜擊敗全球六十幾位對手,榮獲由英國「青年創業國際計劃」頒發嘅「全球青年創業家大獎」,成為首位奪此殊榮嘅香港青年,本身固然吐氣揚眉,亦為香港爭光,真係可喜可賀!

林苑莉嘅創業經歷係咁嘅,佢以自家「速算法」協助學生解答數學題,短短三秒就可以計算出答案。二○一一年三月向香港青年協會申請青年創業計劃,經過面試、獲免息貸款、業務支援等,創立屬於自己嘅教育中心,依家已經有兩間分店。除此之外,佢仲研發咗網上教學平台,令學生可以輕鬆喺網上溫習。至今為止,已有三萬七千名學生透過網上平台或到其教育中心學習,成為佢成功創業嘅見證者。

所以話,香港唔係冇人才,青少年唔一定失落,問題係可唔可以發揮所長,人盡其才啫。舊年兩名科技大學畢業生憑着提倡「先繳費、後用電」及利用手機應用程式協助用戶了解用電量,喺一項全球商業案例挑戰賽中擊敗逾一萬二千名參賽者,摘得桂冠,證明香港學生創意無限,只要能夠專注學業,專心鑽研,絕對可以達到世界一流水準。

弊就弊在近年香港愈來愈政治化,日日嘈喧巴閉,連校園亦不得安寧,有啲學生無心向學,搞政治多過讀書,根本冇機會發揮才能。唔係誇張o架,無論係舊年嘅佔領行動,定係最近嘅反水貨客鬧劇,參與者多數係青少年,當中有大學生,亦有中學生,一個比一個偏激,一個比一個暴力,試問咁又點樣專心讀書呢?

正所謂,有因必有果,香港嘅大學喺國際排名中節節後退,唔係冇原因。尤其係港大、中大及科大三間本地龍頭大學,喺最新公布嘅全球大學聲譽排名榜中齊齊急挫,簡直慘不忍睹。正如學者話齋,唔少大學教授及學生積極參與佔領行動及罷課,根本無法聚焦教研,大學質素好難唔令人懷疑啫。難為三間大學仲自我安慰,聲稱佢哋追求嘅唔係排名喎,你話係咪跌落地揦番拃沙吖。

總而言之,對一個商業城市嚟講,太過政治化絕對唔係一件好事,香港競爭力之所以不斷下跌,咪就係因為政治爭拗太多囉。青少年與其熱衷於做街頭鬥士,不如將精力放喺讀書及創業,好似青年創業家林苑莉咁,唔止自己得益,仲可以貢獻社會,咁先至有意義吖嘛!