剃人頭者，人亦剃其頭。呢個世界好公平嘅，佔領行動逾半個月，搞到天怒人怨，沉默嘅大多數忍無可忍嘞，除咗自發清場，當然亦唔會放過幕後黑手淫賤黎啦。嗱，大批市民自發通宵佔領壹淫媒大樓，誓阻毒果日報出版，呢啲咪叫天理循環，報應不爽囉。
係人都知，淫賤黎唔止為佔中搖旗吶喊，出謀獻策，仲出錢出物，赤膊上陣，係佔中嘅罪魁禍首，佔中三子不過係前台傀儡咋。天有眼嘅，淫賤黎點樣透過美國人之手向泛民政客秘密獻金，點樣向台獨分子取經，點樣勾結外國勢力，早就無所遁形，佢扮晒民主鬥士咁款，呃得到無知少年，又點逃得過市民嘅火眼金睛吖。
即係咁，你做初一，我做十五，淫賤黎以反中亂港為己任，搏晒命鼓吹佔中，有良知嘅市民唔會坐以待斃，一於以其人之道還治其人之身。呢，數以百計嘅示威者喺壹淫媒大樓安營紮寨，阻止毒果報遺禍人間，荼毒青少年，卒之搞到壹淫媒狼狽不堪，要用吊臂車偷雞摸狗咁將報紙運出街，比平時足足遲咗幾粒鐘，仲要甩皮甩骨，有頭冇尾，呢啲咪係咎由自取囉。
冇錯嘞，淫賤黎鼓吹公民抗命，市民一樣可以公民抗命嘅啫。你玩佔領，我又玩佔領；你搞霸道，我又搞霸道；你發動婦孺老弱，我亦動員老老少少；你帶帳篷長期抗爭，我亦紮營奉陪到底，咁先至公道嘛。
可能有見眾怒難犯啩，淫賤黎做咗縮頭烏龜，逃往台灣暫避風頭。對於成個壹淫媒大樓被佔領，淫賤黎唔係反躬自省，而係申請法庭禁制令，簡直惡人先告狀。淫賤黎呀淫賤黎，你日以繼夜、夜以繼日咁煽動並帶頭佔領，阻住無辜市民搵食，全港蒙受浩劫，呢筆數又點計呀？正所謂，冤有頭債有主，受害商戶已經着手向佔中搞手索償，下一個就係淫賤黎喇，睇吓佢匿得幾耐吖。
話時話，正義只會遲到，不會缺席，壹淫媒大樓被佔領，係市民替天行道嘅正義之舉。難為壹淫媒死雞撐飯蓋，抹黑示威者收錢做嘢喎。咁就奇嘞，早前曝光嘅四千萬政治黑金醜聞，證明佔中搞手及政客個個有份收黑金，講到收錢做嘢咯喎，邊個叻得過淫賤黎同埋佢班搞事黑手吖。
仲有更搞笑嘅，壹淫媒窮途末路，又要求警方嚴正執法喎。喂，當初警方揸正嚟做，壹淫媒唔係大大聲話警方「暴力」打壓嘅咩？自恃有美國主子撐腰，使乜哀求警方幫手吖。點都好，警方執法必須一視同仁，金鐘、旺角、銅鑼灣被佔領逾半個月，唔該處理咗先，至於淫賤黎呢個幕後黑手，更加要第一個伏法啦！