開講有話，有食唔食，罪大惡極。「十一」黃金周啱啱結束，正當全世界賺人仔賺得不亦樂乎嘅時候，香港斯人獨憔悴。鬼咩，香港人忙於政治惡鬥，佔領行動搞到全城七國咁亂，內地客嚇到走夾唔抖，購物區水盡鵝飛，食肆、酒店拍烏蠅，你話死唔死吖。
隨着內地經濟高速發展，「五一」、「十一」、春節三個長假，已經逐漸好似聖誕節咁，成為普天同慶嘅節日嘞。好似德國慕尼黑咁吖，當地一間百貨公司就喺電梯裏面，大大隻用中文印咗個標語「『十一』黃金周，金秋歡樂購」，佢哋仲專門為中國遊客設立休息區，等佢哋血拼到攰攰哋可以舒舒服服抖吓，都幾貼心o架。
德國人出盡法寶吸中國客，英國佬亦唔執輸，今時今日倫敦名店請售貨員，好多都要求識講普通話，銀聯終端機亦係基本裝備。如果你呢幾日喺韓國首爾，分分鐘聽人講普通話仲多過韓文，都咪話唔誇張。
又難怪嘅，今年「十一」黃金周出境嘅內地旅客超過一億二千萬人，多過大多數國家嘅人口，唔搶住接財神喎，你估真係嫌錢腥咩？哈，你咪理，有啲香港人真係嫌錢腥，發起乜鬼佔領行動，仲要唔係旺區唔佔，唔係鬧市唔霸，搞到平日應該逼爆嘅金舖、藥房、波鞋店以至手機舖全部門可羅雀，旺角有食肆原本每日做十萬銀生意，跌到得番幾千蚊，亦有珠寶店集團話營業額較舊年同期勁跌四成。反觀隔籬梳打埠，個人遊大增，到處人頭湧湧，商家賺到笑，庫房收入增。佔中佔到肥水流向別人田，你話係咪唔衰攞嚟衰吖。
即係咁，有啲人要同錢作對，有錢都唔賺，呢個係佢哋嘅自由，問題係唔好連累其他人吖嘛，好多打工仔要開工要食飯o架。你哋要佔咪揀個荒島嚟佔囉，到時話之你安營紮寨落地生根啦！
諗落都幾諷刺，當年沙士搞到經濟大蕭條，港府同商界向中央班救兵，要求開放個人遊，點知近年中港矛盾日益尖銳，不斷上演「驅蝗」、「拖篋」等辱客鬧劇，愈來愈多內地客聽見香港就怕怕，依家加埋個佔領行動搞搞震，旅客心寒唔在講，中央分分鐘嬲起上嚟閂水喉，乾脆取消個人遊，冇眼屎乾淨盲。嗱，咪以為好過癮呀，有人計過數，表面上旅遊業只佔本港生產總值唔夠百分之五，但計埋對物流、批發、零售等相關行業嘅貢獻，比重起碼超過一成半，關係到好多人嘅生計o架。
功夫茶好想問一句︰打殘旅遊業，大批基層市民冇飯開，到時係咪班街頭戰士養佢哋呀！