問題食油爆不停 港產官僚懵盛盛

一波未平,一波又起。港府日前先至公布涉及坑渠油嘅下游企業名單增至七百幾間,點知台灣揭發再有公司涉嫌以豬潲油充當食用豬油銷往各地。嗱,見過鬼怕黑,兩岸中國人自相殘殺,問題食品層出不窮,香港次次淪陷,請問港產官僚,今次有冇中招吖?

件事係咁嘅,台灣有大集團旗下公司生產嘅幾款食用豬油,被當局揭發疑使用豬潲油製作。事緣該公司前業務代表自立門戶,成立另一間公司,並將豬潲油冒充食用豬油賣番畀前僱主。兩家公司之間有冇利害關係,係咪狼狽為奸,就要查過至知,不過最大鑊嘅係,台灣強冠豬油出事後,當地食肆紛紛轉用呢間大公司嘅豬油,以為安全喇,點不知呢頭食完坑渠油,嗰頭食埋豬潲油,你話慘唔慘吖。

台灣當局暫時查獲嘅問題豬潲油多達四百幾噸,存貨亦已封存及下架,但到底影響有幾大,目前仲言之尚早。城門失火,殃及池魚,港台交往如此密切,台灣出事,香港咪指望可以獨善其身。事關上次台灣爆出強冠坑渠油,港府最初都以為事不關己,袖手旁觀,點知台灣當局順藤摸瓜,卒之揭發本港係問題豬油源頭之一。今次會唔會歷史重演,無人敢寫包單,唯一肯定嘅係,港產官僚後知後覺,簡直靠害。

事實擺在眼前,本港一再發生輸入性食安事故,當局次次反應都係慢三拍,市民食咗落肚都唔知。嗱,好似早年嘅蘇丹紅鴨蛋事件、德國蛋及肉類受污染事件等等,官老爺都係信誓旦旦聲稱市面無相關食品出售,最後都係自打嘴巴。仲有呀,早前上海爆出福喜過期肉醜聞,食安官僚開頭咪又係矢口否認本港有進口過期肉,結果係點,大家有眼見啦。

講番坑渠油事件,港府話就話成立食用油追蹤及回收制度,亡羊補牢係啱嘅,但以港產官僚嘅辦事效率,拖到何年何月先至成事,根本無人能知。再講吖,整個社會嚴重政治化,佔中搞到香港立立亂,連立法會復會都要押後,社會停擺,港府癱瘓,關乎經濟民生嘅議題無一幸免淪為犧牲品,連港大學者周永新都忍唔住慨嘆,全民退保對市民咁重要,點知家陣無人理會。政客搞風搞雨,市民身受其害,香港點會唔沉淪吖!

點都好,食物安全關係重大,點樣強調都唔過分,尤其係中國人自相殘殺嘅劣根性不改,黑心奸商沆瀣一氣,市民冇啖好食。唔該食安中心醒醒定定,除咗盡快向台灣當局了解情況,仲要加強驗查,咪畀豬潲油為禍香江,為佔中火上加油呀!