阿根廷足料襲港

「香港足總百周年紀念賽」今晚假香港大球場上演，由香港隊迎戰世界盃亞軍阿根廷國家隊，「球王」美斯率領阿古路、迪馬利亞等一眾星級隊友，為祝賀足總百周年獻技，阿根廷領隊馬天奴揚言絕不會Hea踢，並指美斯早前在北京出現水土不服，但會盡量安排美斯披甲上陣。港足總主席梁孔德再度呼籲球迷，想現場一睹「球王」風采，真係要快手撲飛喇！（明珠台今晚8時直播）

馬天奴強調唔會Hea踢

阿根廷今次「足料」夫添訪港，絕對係香港球迷之福，大軍周日晚到埗後，昨日傍晚拉隊到香港大球場操練，由紅磡下榻嘅酒店到大球場沿途一度遇上塞車，在路上聽到有球員不耐煩，大力拍打巴士！抵埗後，一眾球星魚貫步入球場草地展開操練，期間領隊馬天奴與王牌美斯密斟近10分鐘，預計除為今仗部署外，亦查看對方的身體狀況。

馬天奴表示，阿根廷在北京鬥完巴西後再對香港，雖然兩隊實力相距甚遠，但會尊重每一個對手，一定不會Hea踢，至於美斯的身體狀況，馬帥指球員飄洋過海來到亞洲，出現水土不服十分正常，但對於美斯今仗會否上陣，馬天奴未有正面回應，估計美斯未必會正選上陣。阿根廷昨晚操練僅開放首15分鐘予傳媒參觀，期間除見馬天奴與美斯密斟，其餘球員都專注熱身，大隊分成兩組「搓馬騮」，美斯與阿古路、迪馬利亞一組，希古恩則在另一組。至於靚仔球星加高就話大球場草地狀況很好，有助發揮。