摩天齒輪鋸政總 香港點會有運行

男主角坐喺摩天輪上向女友求婚,係唔少愛情電影嘅浪漫橋段,不過唔知大家有冇發現,其實氹氹轉嘅摩天輪,遠望有啲似電鋸嘅齒輪,邊個唔好彩,分分鐘被「鋸」到成頸血,咁就大吉利是嘞。

功夫茶講緊嘅咪就係位於中環海濱、將於下個月中試業嘅巨型摩天輪囉。呢個摩天「齒輪」喺特首辦、政府總部同立法會三大權力核心隔籬,由對岸望過去,十足十「齒輪」咁鋸向港府心臟地帶,認真唔講得笑。不可不知,呢個唔係普通齒輪,而係高六十米、有四十二個車廂嘅超級無敵大齒輪,唔怪得政圈廣泛流傳,呢件「大殺傷力武器」一旦正式運作,政府總部同特首辦公室肯定多災多難。堪輿學家亦批算,摩天輪呈不斷滾動嘅圓形,會破壞代表權力同長官嘅乾位,再加上特首辦西北位有工地,更預示容易有血光、災難同爭吵。咁又係呀,家陣香港正值多事之秋,政治爭拗無日無之,連學生亦愈來愈激,搞到衝擊政府總部,再加上呢個「大鋸」咯喎,真係凶多吉少。

正所謂,唔怕生壞命,最怕改壞名。當初政總「門常開」概念引起唔少爭議,話就話寓意打開大門,廣納民意,但亦令人聯想起無掩雞籠、開門揖盜,結果好嘅唔靈醜嘅靈,政總由施工到啟用,真係甩甩漏漏,笑話百出。

講開又講,「門常開」嘅設計,怪雞程度直頭拍得住北京嘅央視大樓「大褲衩」。設計怪雞不特止,「門常開」仲犯咗風水學上「穿心煞」嘅大忌。大家有眼見,政總啟用以來,港府施政頭頭碰着黑,簡直係寸步難行、動輒得咎,而大小官僚就烏龍百出、醜聞多多。呢,反對派三日一集會,五日一示威,搞到政總好似鬥獸場咁,七國咁亂。當局藉口「維修」加設圍欄,「門常開」變「門常關」,結果一樣被示威者攻陷,唔知好笑定好嬲。

所以話啫,風水呢家嘢,有時真係唔到你唔信。最經典嘅係當年中銀興建新總部大樓,引發一場風水大戰,中銀大廈外形似足三支長劍對正港督府同滙豐總行,冇耐時任港督尤德就喺北京突然病逝,而當年滙豐股價亦一度大跌,據講後來港英為咗解煞,特別喺港督府裏面種柳樹,而滙豐就喺總部頂樓安裝兩門大炮裝飾嚟抗衡。

當然啦,禍福無門,惟人自招。玄學嘅嘢只能作為參考,港府想擺脫衰運,始終都要自己反省,做好本分。如果唔係,話之你門常開或門常關,都一樣冇運行嘅咋!