大劑，呢鋪真係大劑嘞，當局公布台灣坑渠油入口香港多達五百噸，至少有三百家商戶中招，無數市民食咗坑渠油落肚都唔知，你話係咪大劑吖。食衞局局長高永文承認事件丟晒香港嘅架，其實令香港丟架、市民遭殃嘅，咪就係呢班畀坑渠油蒙咗心嘅廢官囉。
嗱，人比人，氣死人；官比官，激死官。睇吓人哋台灣點做吖，坑渠油醜聞爆發後，涉事商家下跪道歉，官府即時公布問題食品清單，主事官員口頭請辭以示問責，反觀港府官僚滋油淡定，拖到尋日先至做嘢，宣布禁止台灣強冠豬油及製品入口本港，同埋勒令供應商及進口商十四日內回收相關產品。喂，事件過咗差唔多兩星期先至做嘢，有冇再遲啲吖？港府官僚懵到上心口，反應慢九拍，簡直靠害。
講真，呢次坑渠油災難唔可以全部怪罪台灣，因為事實已經好清楚，香港係坑渠油嘅來源地之一，本地不法分子掛羊頭賣狗肉，將工業同埋飼料用油脂當作食用油出口到台灣，部分製成品又回流香港，搞到台港兩地齊齊受害，如果唔係台灣揭發事件，港府至今仲矇查查。當局對坑渠油為禍失察在先，反應遲鈍在後，搞到四周都係坑渠油食品，市民根本無啖好食，仲話乜鬼「食安中心」喎，「食不安中心」就真。
聽吓市民點講啦。「東方報業民意調查」顯示，三成七受訪者批評食安中心工作被動，進度緩慢；三成認為市民隨時中招，無自保方法；兩成九直指只靠商戶自律，法例寬鬆落後。對於香港竟然係台灣坑渠油源頭之一，四成一受訪者認為須加強規管廢油處理；三成四批評當局檢查不力，如無王管；兩成三直指事件反映兩地問題油流通頻繁。
冇錯嘞，今次事件除咗反映問題食品追蹤機制出咗問題，亦暴露整個食物監管制度由發牌、生產、出口、入口以至銷售一條龍出事。當局明明話本港冇工廠領有生產食用豬油嘅牌照，但事實係大量飼料同工業油脂被貼上食用豬油標籤，仲長時間銷往台灣，可見唔止食安官僚懵盛盛，海關都係有眼無珠嘅咋。正如學者話齋，部門各自為政，唔出事至奇，要求成立回收局統籌包括廢食油在內嘅回收機制，官僚聽到未呀。
講開又講，黑心食品為禍早就唔係新聞嘞，由蘇丹紅禽蛋、孔雀石綠水產到最近嘅麥當勞過期肉，香港邊一次唔受害呀。以前由廢官周一鑊主政，搞到香港無物不毒，無食能安，家陣換上民望高企嘅高永文局長，照計情況應該有所改善先係o架，點不知到頭來都係一擔擔，吹脹！