香港人不嬲愛心爆棚，眼前就有現成例子嘞，健美先生阿勝患急性肝衰竭命懸一線，家人又唔適合捐肝，短短幾日就有多名市民表示願意捐出部分肝臟移植，唔係親人，勝似親人，認真抵讚！
事實上，用「善心之都」形容香港，一啲冇誇張。一方有難，八方支援，每逢外地發生大災難，港人往往踴躍捐輸，有錢出錢，有力出力，好似華東特大水災、四川汶川大地震咁，港人莫不慷慨解囊。可惜吖，此情可待成追憶，今時唔同往日，恐怕再冇血濃於水呢支歌仔唱咯。
就講上個月雲南昭通發生大地震，受災人口超過一百萬，規模唔細o架，但港人對捐輸反應冷淡。同樣係地震，四年前青海玉樹發生嗰次，傷亡少得多，港人捐款反而更踴躍。宣明會嘅統計數字顯示，當年玉樹地震，佢哋收到四千幾萬元捐款，今次雲南地震，目前只收到七百萬元左右，得番六分之一多啲。其他慈善團體近年亦同樣遇到類似尷尬情況，證明市民對內地賑災由熱轉冷係普遍現象。
因乜解究令港人對內地受災同胞變得「手緊」呢？近年內地經濟迅速發展，中港矛盾日益尖銳，可能係主要因素，正如有網友留言︰「大陸人咁有錢，香港咁窮，使乜捐去大陸。」兩地民眾猜忌不斷加深，而內地官場腐敗，大小貪官對善款上下其手，香港人冇理由捐款畀貪官啩，係咪？
再講吖，家陣中國成為全球第二大經濟體，財大氣粗，領導人外訪，一出手就係幾十億上百億美元「大禮」，免除窮國欠債郁下幾十億上百億美元，眼都唔眨下，真係大方到冇朋友，但係救助受災同胞就揞住荷包，慳得就慳。莫講話香港人，內地百姓一樣睇唔過眼，有人甚至話，寧願將銀紙擦屁股，都唔捐畀政府。
政府信唔過，官辦慈善團體同樣誠信破產。呢，好似名氣最大嘅中國紅十字會咁，烏煙瘴氣，管理混亂，醜聞從未停過，由郭美美事件開始，鑊鑊新鮮鑊鑊甘，近來更被指涉及買賣器官，真係睇見都眼冤。如果港人嘅善款捐咗畀呢啲咁嘅「慈善團體」喎，倒錢落鹹水海都冇咁嬲啦。
可能有人會話，即使喺富裕嘅香港，一樣有窮人，內地貧富懸殊更加犀利，唔可以因為部分人先富起來，就忽視一群真正有需要嘅人。道理係啱嘅，有朝一日內地徹底剷除腐敗，善款一分一毫都用得其所，到時港人自然捐得心甘情願啦。